ننګرهار کې د ماشومانو د ګوزڼ (پولیو) ضد واکسین د یوه بل کمپاین پرانستلو پر مهال، د یاد ولایت د عامې روغتیا ریاست مسوولان وايي چې د روان میلادي کال له پیل راهیسې د دې ولایت په مختلفو سیمو کې د پولیو پنځه مثبتې پیښې ثبت شوې دي.
مسوولانو زیاتوي، یادې پېښې وروسته له هغې ثبت شوې چې له پاکستان څخه د افغان کډوالو د جبري راستنېدو لړۍ چټکه شوه.
د ننګرهار عامې روغتیا رییس امین الله شریف وايي: « موږ پنځه مثبتې واقعې لرو او کوښښ کوو چې ښه رسیدګي ورته وکړو. زموږ هڅه دا ده چې د پولیو ګراف نور هم راټیټ کړو. موږ خپل پوښښ تر ۹۸ سلنو رسولی و، خو له پاکستان څخه په زور د مهاجرو له شړلو سره په مهاجرو ماشومانو کې مثبتې پېښې ثبت شوې دي.»
د مسوولانو په خبره، د دې مثبتو پېښو د کنټرول په موخه د ولایت په ۲۲ ولسوالیو کې د ګوزڼ ضد واکسینونو کمپاین پیل شوی چې په کې د واکسین څاڅکي او زرقي ډولونه شامل دي.
ختیځ زون کې د کتلوي معافیت آمر روغتیاپال حکم خان ګلابزوی وايي: « دغه کمپاین د ننګرهار په ۲۲ ولسوالیو کې ترسره کېږي چې په ۱۴ کې به د خولې له لارې څاڅکي ورکړل شي او اووه ورځې به ادامه ولري. په پاتې اتو ولسوالیو کې به د پولیو زرقي واکسین تطبیق شي او څلور ورځې به ادامه ولري. په دې کمپاین کې به ۹۸۰ زره ماشومانو ته واکسین وشي.»
د ولایتي ادارې د معلوماتو له مخې، دا کمپاین د ۶۰۰۰ رضا کارانو او سلګونه سوپروایزرانو او روغتیایي مبلغانو پر مټ کیږي.
حکم خان ګلابزوی په دې اړه وايي: « په دغه کمپاین کې ۳ زره ټیمونه یا ۶ زره رضاکاران، ۴۵ سوپروایزران او ۱۱۳ کوارډیناټوران شامل وي چې له ډلې یې ۳ زره ښځې هم د عامه پوهاوي لپاره کار کوي.»
د ننګرهار عامې روغتیا ریاست د معلوماتو له مخې، اوسمهال د ننګرهار ۹۸ سلنه سیمو کې له پنځو کلونو څخه کم عمره ماشومانو ته د پولیو واکسین تطبیقېږي او هڅه کېږي چې دا فیصدي سلو ته ورسول شي چې د ماشومانو ګوزڼ له دې ولایت څخه محو شي.
