د کندهار بېپولو ډاکټرانو روغتیايي مرکز ته هره ورځ په خوارځواکۍ او نورو ناروغیو اخته ګڼ شمېر ماشومان د درملنې لپاره راوستل کېږي.
مسوولین وایي، په دې مرکز کې د روان کال له جنورۍ څخه د جولای تر پایه شاوخوا ۱۲ زره ۵۳۰ ماشومان معاینه شوي چې له ډلې یې ۳ زره۴۵۰ ماشومان په شدیده خوارځواکۍ اخته وو او ۱۲۹۱ ماشومان د روغتیايي اختلا لونو له امله بستر شوي دي.
د مسوولینو په وینا، د ۲۰۲۵ کال په پرتله سږ کال د شدیدې خوارځواکۍ په پېښو کې شاوخوا ۲۸ تر۳۰ سلنه زیاتوالی راغلی.
د بې پولو ډاکټرانو روغتون مسوول ډاکټر ضیاالرحمن وايي: « د ۲۰۲۶ کال له پیل د جولای تر پایه پورې، موږ ټولټال ۱۲ زره ۵۳۰ تنه ماشومان سکرین کړي چې له ډلې یې ۳ زره ۴۵۰ ماشومان په شدیده خوارځواکۍ اخته وو. همدارنګه ۱ زره ۲۹۱ ماشومان له اختلال سره مخ وو او له موږ سره بستر دي. که موږ ۲۰۲۶ کال له ۲۰۲۵ کال سره پرتله کړو، د خوارځواکۍ په کچه کې له ۲۸ تر ۳۰ سلنو زیاتوالی راغلی.»
د بې پولو ډاکټرانو په وینا، وچکالي، د بهرنیو مرستو کمېدل او د کډوالو راستنېدل په هېواد کې د خوارځواکو ماشومانو د زیاتېدو له مهمو لاملونو څخه دي؛ په داسې حال کې چې روغتیايي خدمتونو ته محدود لاسرسی د دغو ماشومانو درملنه لا پېچلې کړې ده.
د بېپولو ډاکټرانو روغتون مسوول په دې اړه وايي: « د نړیوالو مرستو کمېدل سبب شوي چې خوارځواکي په خپل وخت تشخیص نه شي او دا بیا د اختلالونو د شدت سبب کېږي. همدارنګه د ګڼو کډوالو راتګ هم ښايي اغېز ولري، د کافي روغتیايي سرچینو نه شتون یې هم بل لامل دی.»
د بې پولو ډاکټرانو روغتون روغتیا پاله نازیه وايي: « کله چې ماشوم ته د مور شیدې په کافي اندازه ونه رسېږي او یا دا چې میندې په خپله هم په خوارځواکۍ اخته وي، دا د دې لامل کېږي چې ماشومان په خوارځواکۍ اخته شي.»
بله خوا، د خوارځواکو ماشومانو پایوازان د درملنې له خدمتونو خوښ دي، خو وایي د درملو او نورو روغتیايي اسانتیاوو لا ډېرېدو ته اړتیا ده.
په خوارځواکۍ د یوه اخته ماشوم پایواز نفس ګل وايي: « زموږ ماشوم د څلورو ورځو وو چې مور یې ناروغه شوې او شیدې یې وچې شوې. موږ کورني خواړه ورکول، خو ماشوم ورځ تر بلې کمزوری شو او اوس دا دی په خوارځواکۍ اخته دی.»
د یوه بل ناروغ ماشوم پایواز حلیمه وايي: « زما ماشوم اول شیري ناروغۍ ونیوه او بیا چې له هغه ښه شو، په تبو او استفراغ اخته شو. بیا مې درته راوست او دوی وویل چې په خوارځواکۍ اخته شوی.»
د خوارځواکۍ د زیاتېدو له روان وضعیت سره، روغتیايي مسوولین ټینګار کوي چې د ماشومانو د ژوند ژغورلو لپاره په وخت تشخیص، درملنه او د روغتیايي خدمتونو پراختیا ته اړتیا ده.
