هلمند کې په تېرو پنځو کلونو کې د روغتیايي مرکزونو شمېر له ۱۰۹ څخه ۲۶۱ ته لوړ شوی.
د دې ولایت د عامې روغتیا ریاست مسوولین وايي، په دې موده کې ۱۵۲ نوي مرکزونه جوړ شوي چې ورسره د لرو پرتو سیمو اوسېدونکو ته روغتیايي خدمتونو ته د لاسرسي زمینه هم پراخه شوې ده.
د هلمند عامې روغتیا رییس، نقیب الله فاتح وايي: « په هلمند ولایت کې روغتیايي مرکزونه ډېر کم وو او شمېر یې تر ۱۰۹ ته رسېده. دا مهال هلمند کې د روغتیايي مرکزونو شمېر ۲۵۷ ته لوړ شوی. موږ په دې هم بریالي شوي یو چې تر ۴۰ سلنه روغتیايي مرکزونو ته خپلې ودانۍ جوړې کړو.»
د عامې روغتیا ریاست مسوولین وايي، د روغتیايي خدمتونو د لا پراختیا لپاره نور پلانونه هم لري.
د دوی په خبره، د اسلامي امارت د مشرتابه له لوري پلان منظور شوی چې د هلمند په هره ولسوالۍ کې یو لوی روغتیايي مرکز جوړ شي.
نقیب الله فاتح زیاتوي: « د امیرالمؤمنین په امر د هلمند په هره ولسوالۍ کې د یوه لوی روغتون د جوړېدو پلان لرو.»
د هلمند یو شمېر اوسېدونکي د روغتیايي مرکزونو له زیاتېدو هرکلی کوي او وايي، په لرو پرتو سیمو کې د روغتیايي خدمتونو پراختیا کولی شي د ناروغانو د درملنې ستونزې راکمې کړي.
د هلمند اوسېدونکی محمدحسن وايي: « اوس چې د هلمند نفوس هم زیات شوی، نو اړتیا ده چې د روغتونونو شمېر هم ډېر شي. د نفوسو له ډېرېدو سره ناورغان هم ډېرېږي او دا به ډېر ښه شي که نور روغتونونه هم جوړ شي.»
د هلمند اوسېدونکی عبدالله وايي: « موږ نه یوازې د هلمند بلکې د افغانستان په هر ګوټ کې پر آبادۍ خوښ یو. موږ هیله لرو د هلمند ترڅنګ، د افغانستان په هره ولسوالۍ کې سهولتونه رامنځته شي.»
د هلمند د عامې روغتیا ریاست په داسې حال کې د روغتیايي مرکزونو د لا زیاتېدو خبر ورکوي چې لا هم د دې ولایت په ځینو لرو پرتو سیمو کې د روغتیايي خدمتونو د پراختیا اړتیا شته. مسوولین ټینګار کوي چې په راتلونکو پلانونو کې د ټولو ۱۸ ولسوالیو لپاره د لویو روغتیايي مرکزونو جوړول هم شامل دي.
