په هرات کې د افغان سرې میاشتې ټولنې د لوېدیځ زون د رواني ناروغانو ساتنې او درملنې له مرکز څخه ۳۷ تنه هغه نارینه ناروغان رخصت او خپلو کورنیو ته وسپارل شول چې د درملنې له بشپړولو وروسته یې روغتیايي حالت ښه شوی.
لوېدیځ زون کې د سرې میاشتې ټولنې مسوولین وايي، یاد ناروغان له طبي درملنې او پاملرنې وروسته روغ شوي دي.
دوی د روغو شویو کسانو له کورنیو غواړي چې له رغېدلو کسانو سره نېک چلن وکړي او رواني وضعیت ته یې پام وساتي.
لوېدیځ زون کې د افغاني سرې میاشتې ټولنې ساحوي رییس ډاکټر عبدالبصیر رحماني وايي: « الحمدالله ۳۷ تنه ناروغان اوس ښه شوي او د کورنۍ غړي یې دلته راغوښتل شوي، ترڅو دوی ورته وسپارل شي. باید ووایم چې دغه ناروغان به هر میاشت یو ځل روغتون ته راوړل کېږي، ترڅو د دوی روغتیايي وضعیت تر څارنې لاندې وي.»
د مسوولینو د معلوماتو له مخې، اوس مهال هرات کې د سرې میاشتې رواني ناروغانو درملنې مرکز کې ۱۱۶۴ رواني ناروغان تر درملنې او څارنې لاندې دي چې له ډلې یې ۴۰۴ تنه بستر او ۷۶۰ تنه له بستر بهر تر درملنې لاندې دي.
هرات کې د افغاني سرې میاشتې د رواني ناروغانو درملنې مرکز مدیر ډاکتر رامین نېکفام وايي: « دلته یو زر ۱۶۵ تنه ناورغان د سرې میاشتې د روغتیايي، ټولنیزو او مراقبتي خدماتو تر پوښښ لاندې دي چې له ډلې یې ۳۴۵ تنه نارینه ناروغان او ۵۹ تنې ښځینه ناروغانې بستر دي او ۵۲۹ تنه نارینه او ۲۳۱ تنې ښځینه ناروغان له بستر څخه د باندې تر درملنې لاندې دي.»
دغه مرکز کې له رواني ناروغیو څخه روغ شوي کسان هم د سرې میاشتې له خوا ورته د درملنې زمینې برابرېدو خوښي څرګندوي او وایي، هلته له درملنې سره یې اوس وضعیت کې د پام وړ ښه والی راغلی.
د زمري په نوم یو تن روغ شوی کس وايي: « د خدای شکر دی درملنه مې بشپړه شوه او اوس یې د رخصتولو لپاره راوستی یم. زه د سرې میاشتې روغتون له ټولو کارکوونکو او په ځانګړې توګه ډاکټرانو ډېره مننه کوم، دوی له زموږ سره ډېر زحمتونه وګالل.»
اغا محمد هم له همدې روغتون رخصت شوی او وايي: « درې کاله دلته تر درملنې لاندې وم، اوس ښه شوی یم او غواړم خپلې کورنۍ ته لاړ شم. له ډاکټر صاحبانو او ټولو کارکوونکو ډېره مننه کوم.»
د یادونې وړ ده چې د سرې میاشتې ټولنې له لوري له روغو شويو کسانو سره د ټرانسپورټ لګښتونو په موخه ۵۰۰۰ افغانۍ نغدي مرسته هم شوې ده.
