اروپايي ټولنه وايي چې په افغانستان کې د میندو او ماشومانو روغتیايي خدمتونو ته پراخ او دوامداره لاسرسی کولی شي د میندو د ډېری هغو مړینو مخنیوی وکړي چې درملنه یې کېدای شي.
د دې ټولنې په خبره، افغانستان لا هم د نړۍ له هغو هېوادونو دی چې د میندو د مړینې تر ټولو لوړه کچه په کې ثبت شوې ده.
اروپايي ټولنې دا باور هم څرګند کړی چې روغتیایي خدمتونو ته پراخ لاسرسی او د کیفیت لوړول یې کولی شي چې د دغو مړینو کچه راټیټه کړي.
د اروپايي ټولنې د خبرپاڼې یوه برخه کې راغلي: « د مسلکي روغتیايي کارکوونکو شتون، د میندوارۍ پر مهال منظمې طبي معاینې، خوندي زېږونتنونه او له زېږون وروسته پاملرنه د هغو مړینو د مخنیوي لپاره حیاتي ارزښت لري چې د افغان میندو او ماشومانو ترمنځ هر کال رامنځته کېږي.»
نړیوال روغتیايي بنسټونه بیا وايي چې افغانستان د څو لسیزو جګړو، اقتصادي ستونزو، د روغتیايي کارکوونکو د کمښت او په لرې پرتو سیمو کې د روغتیايي مرکزونو د محدود لاسرسي له امله د میندو او ماشومانو د روغتیا په برخه کې له جدي ننګونو سره مخ دی.
د روغتیا نړیوال سازمان او د ملګرو ملتونو د وګړو صندوق خبرداری ورکړی چې د روغتیايي سکټور د تمویل کمښت او د بشري مرستو محدودېدل به د ښځو او ماشومانو لپاره د ژوند ژغورونکو روغتیايي خدمتونو پر وړاندې نورې ستونزې هم زیاتې کړي.
دواړو ادارو د میندو او د تولیدي روغتیا په برخه کې د دوامدارې پانګونې، د روزل شویو قابله ګانو د شمېر زیاتولو او بېړنیو ولادي خدمتونو د پیاوړتیا غوښتنه کړې.
اروپايي ټولنې چې د افغانستان له مهمو بشري مرستندویانو څخه شمېرل کېږي ویلي، د میندو روغتیا، د نسايي روغتیا خدمتونه او د روغتیايي کارکوونکو روزنه یې د ملاتړ له مهمو برخو څخه دي.
د اروپايي ټولنې د خبرپاڼې یوه برخه کې راغلي: « د مسلکي قابله ګانو، بېړنیو روغتیايي خدمتونو او پر وخت طبي مرستو ته د لاسرسي پراختیا کولی شي د میندو او نویو زېږېدلو ماشومانو د مړینې کچه په څرګند ډول راټیټه کړي، خو د نړیوالې پراختیايي بودیجې کمېدو د افغانستان پر روغتیايي نظام فشارونه لا زیات کړي دي.»
په افغانستان کې د میندو مړینی په تړاو دا اندیښنه داسې مهال ښودل شوی چې له افغانستان سره د بشري مرستو کچه خورا ټیټه شوې او دا وېره شته چې روغتیایي خدمتونو کچه نوره هم ټیټه شي.
له دې مخکې د روغتیا نړیوال سازمان په یوه راپور کې ویلي وو چې د بودیجې کمښت له امله یې په افغانستان کې له ۱۵۰ څخه زیات روغتیايي مرکزونه تړلي او ورسره میلیونونه خلک له دې خدمتونو بې برخې شوي دي.
