ګوزڼ یا پولیو هغه ساري ناروغي ده چې ډېری ماشومان د ژوند په لومړیو کلونو کې پرې اخته کېږي او د بدن عصبي سیسټم اغېزمنوي. په ځینو مواردو کې د دایمي فلج او نورو جدي ستونزو لامل کېدای شي.
د دې ناروغۍ لپاره ځانګړی درملنه نه شته، خو د واکسین له لارې یې مخنیوی کېدای شي.
د پولیو پر وړاندې واکسین د ماشومانو د خوندي ساتلو تر ټولو اغېزناکه لاره بلل کېږي چې له کلونو راهیسې د نړۍ په بېلابېلو هېوادونو کې د دې ناروغۍ د کمولو او له منځه وړلو لپاره کارول کېږي.
اوس مهال د پولیو له منځه وړلو نړیوال نوښت په خپل تازه راپور کې ویلي چې په افغانستان کې د پولیو ویروس د څلورو نویو پېښو د ثبت کېدو خبر ورکړی. د نوښت له خوا خپاره شوي راپور پر بنسټ، دا تازه پېښې په هرات، ننګرهار او هلمند ولایتونو کې ثبت شوې دي.
د پولیو له منځه وړلو نړیوال نوښت ویلي: « په روانه اوونۍ کې په ننګرهار، هرات او هلمند ولایتونو کې د پولیو څلور نوې پېښې ثبت شوې دي.»
موږ د دې موضوع په تړاو د عامې روغتیا وزارت له ویاند شرافت زمان سره په ځلونو اړیکه وکړه، خو د راپور تر خپرېدو یې خپل نظر له موږ سره شریک نه کړ.
دا په داسې حال کې ده چې د پولیو د له منځه وړلو نړیوال نوښت په خپل راپور کې زیاته کړې چې د ۲۰۲۶ کال له پیل څخه تر اوسه په افغانستان کې د پولیو ویروس ټولټال ۱۱ مثبتې پېښې ثبت شوې دي.
تر اوسه د افغانستان عامې روغتیا وزارت د دغو تازه پېښو په اړه رسمي غبرګون نه دی ښودلی.
