ننګرهار کې د ختیځ زون په کچه د روغتیايي کمپلېکس جوړېدو چارې په تېر جمهوري نظام کې پیل، خو بشپړې نه شوې. اوس د دې کمپلېکس مسوولین وايي، د اسلامي امارت له راتګ سره یې کارونه بېرته پيل شوي او دا مهال یې چارې ۶۰ سلنه بشپړې شوې دي.
د مسوولینو په خبره، یاد کمپلېکس اوسمهال د ۶۰۰ بسترونو ظرفیت لري، خو په راتلونکو پړاوونو کې به تر ۱۰۰۰ بسترونو پورې پراخ شي.
د ننګر هار عامې روغتیا رییس امین الله شریف وايي: « د اوس لپاره دا روغتون ۶۰۰ بستریز دی مګر هڅه کېږي چې ظرفیت یې ۱۰۰۰ بسترونو ته پورته شي. کله چې دا زر بستریز روغتون جوړ شي، د زون په کچه به د ټولو خلکو ستونزې حل شي. تاسو وینئ چې کارونه یې په چټکۍ سره روان دي مګر ځینې کارونه د نقشې د بدلون له امله ولاړ دي. موږ له ساختماني شرکت سره خبرې کوو چې د جوړولو کارونه نور هم چټک کړي، ترڅو زموږ د خلکو روغتیايي ستونزې هوارې شي.»
بله خوا، د پروژې انجینران وایي، ټولې رغنیزې چارې د تخنیکي معیارونو او ښه کیفیت په پام کې نیولو سره روانې دي او هڅه کېږي چې پروژه پر خپل وخت ګټه استنې ته وسپارل شي.
د پروژې انجینر اېمل هاشمي وايي: « د خدای شکر دی چې له سیاسي تحول وروسته زموږ کارونه یوځل بیا پيل شول. زموږ د نقشو تعدیلات هم اتیا په سلو کې بشپړ شوي او پر پاتې نورو هم کار روان دی. موږ غواړو د دې روغتون جوړولو کارونه په ښه کیفیت او چټکي سره مخکې یوسو.»
په همدې حال کې د ننګرهار اوسېدونکي د دې پروژې له پرمختګ خوښي څرګندوي او وایي، د کمپلېکس په بشپړېدو سره به د روغتیا په برخه کې شته ستونزې راکمې او ناروغان به د درملنې لپاره بهرنیو هېوادونو ته د تګ له اړتیا تر ډېره بریده خلاص شي.
د ننګرهار اوسېدونکی هاشم خان وايي: « په کار ده چې د دې روغتون کارونه چټک مخکې لاړ شي، ترڅو خلک لرې ځایونو ته له تګ خلاص شي.»
د ننګرهار اوسېدونکی زړګی وايي: « که دا روغتون جوړ شي، موږ به د درملنې لپاره پاکستان ته ضرورت نه لرو. باید کارونه یې نور هم چټک شي.»
ختیځ روغتیایي کمپلېکس د ننګرهار په مرکز کې د ختیځ زون لپاره د یوه ستر تخصصي روغتیایي مرکز په توګه جوړېږي.
ټاکل شوې دا کمپلېکس د ۱۰۰۰ بسترونو په ظرفیت، په پرمختللو طبي تجهیزاتو سمبال او د اړتیا وړ تخصصي څانګو په لرلو سره د ننګرهار، کونړ، لغمان او نورستان ولایتونو اوسېدونکو معیاري روغتیایي خدمتونه وړاندې کړي.
