د عامې روغتیا وزیر افغانستان ته د روغتیا نړیوال سازمان له راغلي پلاوي سره کتلي. د دې وزارت د چارواکو په خبره، نور جلال جلالي په دې لیدنه کې د هېواد له روغتیايي سکټور سره نړیوالې مرستې مهمې بللې او د صحي سکټور د ځان بسیاینې لپاره یې د تخنیکي او مالي ملاتړ غوښتنه کړې.
نوموړي په دې برخه کې نړیواله همکاري نه یوازې د روغتيايي خدمتونو د پیاوړتیا بلکې د وژونکو ناروغیو د کنټرول لپاره هم اغېزناکه ګڼلې.
نورجلال جلالي زیاته کړې: « موږ د خودکفا روغتیايي سیسټم لپاره کار کوو او هیله لرو چې زموږ نړیوال همکاران په دې برخه کې زموږ تخنیکي او مالي ملاتړ وکړي، ترڅو موږ خپل هدف ته ورسېږو.»
په دې ناسته کې د عامې روغتیا وزیر له مقابل لوري غوښتي چې د حمایه شویو پروژو له لارې دې افغانستان کې د تولید شویو درملو ګټه واخلي. د هغه په خبره، له دې سره به د وارداتي درملو کچه کمه او د کورنیو درملو د کیفیت کچه به لوړه شي او هم به خلکو ته کاري فرصتونه ایجاد شي.
جلالي دغه راز ویلي، عامې روغتیا وزارت د نړیوالو مرستو په مټ بریالی شوی چې میلیونونه افغانانو ته د ګوزڼ(پولیو)، شري(سرخکان) او تورې ټوخلې په څېر ژوند ګواښوونکو ناروغیو اخته ناروغانو ته پر وخت روغتیايي خدمات وړاندې کړي.
عامې روغتیا وزیر زیاته کړې، له پولیو سره مبارزه او له منځه وړل د عامې روغتیا وزارت هدف ګرځېدلی.
نور جلال جلالي په دې اړه وايي: « یو پیاوړی او اغېزناک روغتیايي سیسټم د ناروغیو د کنټرول او محو کولو اړوند موخو ترلاسه کولو لپاره اساسي بنسټ جوړوي. د پولیو له منځه وړلو پروګرام د همدې موخې یو مثال دی. د افغانستان اسلامي امارت عامې روغتیا وزارت له پولیو سره د مبارزې په برخه کې قوي تعهد لري او هڅه کوي چې په خپل ټول توان سره دا ناروغۍ له افغانستانه محو کړو.»
په ورته مهال، ډاکټران هم د درملو ترڅنګ په هېواد کې د صحی مرکزونو او روغتونونو او د پېچلو معایناتو او عملیاتو لپاره د تخنیکي وسایلو او ماشین الاتو کمښت ته په کتو، په دې برخه کې نړیواله همکاري حیاتي ګڼي.
د دوی په باور، شته ستونزو او ننګونو ته رسېدنه کولی شي افغان ناروغان د درملنې په موخه بهر ته له تګ او د پانګې له وتلو را وګرځوي.
داکټر عبدالرازق احمدزی وايي: « که نړیوال له موږ سره د روغتونونو جوړولو، تجهیز او هغو ناروغیو د درملنې په برخه کې مرسته وکړي چې د درملنې لپاره یې زموږ هېوادوال نورو هېوادونو ته ځي، زه باور لرم چې زموږ روغتیايي سیسټم به په خپلو پښو ودرېږي.»
همدارنګه، عامې روغتیا وزارت وايي په پام کې لري چې د ابتدايي او ثانوي متوازن روغتیايي انکشاف په موخه، د هرې ولسوالۍ په کچه روغتون او روغتیايي مرکزونه جوړ کړي.
دا په داسې حال کې ده چې د ختیځې مدیترانې لپاره د روغتیا نړیوال سازمان مشرې حنان بلخي د ریاست الوزرا له اداري مرستیال مولوي عبدالسلام حنفي سره په لیدنه کې د افغانستان له روغتیايي سکټور سره د نړیوالو مرستو پر اړتیا ټینګار کړی او د همغږۍ د زیاتېدو په صورت کې یې تر راتلونکي یوه کاله د پولیو له منځه وړلو هیله څرګنده کړې.
