د ملي دفاع وزارت د روغتیایي چارو قوماندانۍ د (طبي اخلاقو او مسلکي مسوولیت) تر سرلیک لاندې علمي کنفرانس ترسره کړ. په دې دوه ورځني کنفرانس کې د هېواد د بېلابېلو روغتونونو ډاکترانو، متخصصانو او د روغتیا برخې کارکوونکو ګډون کړی و.
د دې کنفرانس پر مهال یو شمېر حکومتي ادارو د هېواد په روغتیايي سکټور کې د طبي اخلاقو پر پیاوړتیا ټینګار وکړ.
د دوی په خبرو، د معاینې پرمهال له ناروغ سره ناسم چلن، له اړتیا پرته د ډېرو طبي معایناتو او درملو تجویز، د تخصص نه موجودیت، د ناروغانو ترمنځ تبعیضي چلن او په درملنه کې ناغیړي د ډاکټرانو ترمنځ د طبي اخلاقو خلاف کړنې یادیږي.
دوی د ناروغ د خصوصي حریم د خوندیتوب او د محرمیت پر ساتنې سربېره، له ډاکټرانو غواړي چې د درملنې پرمهال د ناروغ بشپړ رضایت ترلاسه کړي او د غوره درملنې په موخه خپله طبي وړتیا لوړه کړي.
د ریاست الوزار اداري مرستیال بیا په دې اړه د دفاع وزارت جوړ شوي سیمنیار کې جګړې او نورې ټولنیزې ناخوالې د طبي اخلاقو د نه مراعت لوی لاملونه بولي.
مولوي عبدالسلام حنفي وايي: « زموږ ګران هېواد د تحولاتو پرمهال د نورو برخو په څېر، له طبي پلوه هم متضرر شوی دی. د طبابت اخلاق هم یو له هغو مواردو دي چې د تحمیلي جګړو له امله یې زیان لیدلی.»
بله خوا، د دفاع وزارت مسوولین پر ډاکټرانو نیوکه کوي چې د حکومت له بندیزونو سربېره ناروغاتو ته لاهم د پاکستان قاچاقي او په بازار کې پاتې درمل لیکي.
د دفاع وزارت د لوی درستیز د روغتیايي چارو قومندان طاهر احرار وايي: « زه به څو هغو ټکو ته اشاره وکړم چې ډاکټرانو یې له لارې نه یوازې د طبابت سپکاوی کړی بلکې د هېواد خپلواکي یې هم تر پښو لاندې کړې ده. ستا د ناغېړۍ له امله زموږ ناروغان په تورخم کې سره لمر ته ولاړ دي او د یوه فاسد هېواد په وېزه اخستلو تر ۲۰۰۰ ډالرو لګوي. ډاکټر صاحبانو! ستاسو اخلاقو دولتي روغتونونه داسې حالت ته رسولي چې څوک نه پوهېږي دا روغتونونه دي که ګودامونه.»
د دوی په باور، د طبي اخلاقو نه رعایت کېدل د هېواد پر ډاکټرانو باور پیکه کړی او له همدې کبله یې ډېری ناروغان د درملنې په موخه بهر تللو ته اړ کړي.
