له ۱۹۴۹ زېږدیز کال راهیسې چې کله په چین کې کمونېست ګوند واک ته رسېدلی، د مسکو او بېجېنګ اړیکې له استثنايي ترینګلتیاوو پرته، په تدریجي ډول پیاوړې شوې او د دوه اړخیزو همکاریو لپاره په کې نوي نوښتونه هم رامنځته شوي دي.
خو د دواړو هېوادونو د اړیکو فصل وروسته له هغې لا ډېر غښتلی شو چې په ۲۰۱۴ زېږدیز کال کې روسیه له اوکراین څخه د کریمیا ټاپو له نیولو وروسته، لوېدیځ سره د مخالفت نوي پړاوو ته داخله شوه او بېجېنګ د چټکې اقتصادي ودې له امله، د امریکا له اقتصادي سیالۍ او تقابل سره مخ شو.
زبرځواک هېوادونه که له یوې خوا سیاسي اختلافات لري، خو ورسره همهاله د خپلو ملي او نړیوالو ګټو لپاره خپلمنځي اقتصادي همکارۍ هم نه پرې کوي.
د روسیې ولسمشر چین ته د تازه دوه ورځني سفر پر مهال ویلي، له چین سره یې اړیکې نړیوال ثبات ته د زیان اړولو په مانا نه دي. د نوموړي په خبره، د دواړو هېوادونه ترمنځ به د سياسي همکاريو ترڅنګ، د ټکنالوژۍ او اقتصادي برخو اړیکې هم لا غښتلې کړي.
ولادیمیر پوتین زیاته کړې: « د بېجېنګ او مسکو اړیکې د ثبات لپاره دي نه د چا په ضد. دواړه هېوادونه په اقتصاد، انرژۍ، سوداګرۍ او نړیوال سیاست کې ګډه همکاري کوي او روسیه به چین ته د انرژۍ مهم صادرونکی هېواد پاتې شي.»
په ورته مهال، د چین ولسمشر چې تېره اوونۍ یې د امریکا ولسمشر ډونالډ ټرمپ کوربه توب وکړ، په نړیوالو مسایلو کې د بېجېنګ او مسکو ګډه ملګرتیا او سټراټیژیکه همکاري یوه جدي اړتیا بولي او وايي، غواړي نړۍ له یو قطبۍ واک څخه خلاصه کړي او نړیوال نظام پر څو قطبي واکونو ووېشي.
شي جېنګ پېنګ ویلي: « نړۍ نن له سولې ډېره لرې شوې. یو اړخیزه واک ساتنه او سیاست خطرونه نور هم ژوروي. د ځنګلي قانون پر بنسټ نړۍ د شاتګ له خطرونو سره مخ ده. ما د ګډې ټولنې رغونې لپاره د څلور اقداماتو وړاندیز کړی چې د نړیوالې ټولنې او روسیې ملاتړ لري.»
چین ته د روسیې ولسمشر په دې سفر کې د سوداګرۍ او ټکنالورۍ په برخه کې د ګډو همکاریو د زیاتولو په موخه، څه باندې شل تړونونه لاسلیک شوي. د ګازو د نل لیکې غځولو مهمه پروژه چې د بېجېنګ او مسکو ترمنځ یې له کلونو راهیسې د عملي تطبیق ژمنې شوې، د تړونونو په نوملړ کې نه ده شامله.
په راپورونو کې راغلي، چین چې له هرمز تنګي له لارې د خپلې اړتیا وړ شاوخوا ۴۵ سلنه انرژي واردوي، په دې برخه کې د رامنځته شوي بحران د مخنیوي لپاره د ایران جګړې ژر پای ته رسېدو ټینګار کړی.
چین ته د روسیې ولسمشر ولادیمیر پوتین سفر داسې مهال ترسره کېږي چې تېره اوونۍ د امریکا ولسمشر هم چین د سفر پرمهال له خپل چینايي سیال سره پر دوه اړخیزو اقتصادي او نړیوالو مسایلو خبرې وکړې.
