ننګرهار کې د مطالعې فرهنګ دودېدو او دې برخه کې د ځوانانو هڅولو په موخه د کتاب درې ورځنی نندارتون پرانستل شو.
مسوولین وايي، په دې نندارتون کې دیني، ساینسي، طبي او بېلابېل ټولنیز کتابونه نندارې ته اېښودل شوي.
د نندارتون ترتیبونکی محمد جمیل وسیم وايي: « ستره موخه مو دا ده چې په ټولنه کې د کتاب لوستلو فرهنګ دود کړو او خلک او لوستونکي خپلو مسوولیتونو ته متوجه کړو.»
د دې نندارتون پر مهال د خپرندویه ټولنو مسوولینو او همدارنګه ګډونوالو د مطالعې دود عامېدو په موخه د دې ډول نندارتونو پر دوام سربیره، د لیکوالانو پر ملاتړ او د دوی د اثارو چاپیدو برخه کې له دوی سره پر همکاري ټینګار وکړ.
د نندارتون ګډونوال صبغت الله وايي: « زموږ ښوونکي خواري کوي کتابونه لیکي، خو بیا یې د چاپ وس نه لري. هیله ده په دې برخه کې همکاري وشي.»
د ننګرهار اطلاعاتو او فرهنګ ریاست مسوولین وایي، د لیکوالانو ملاتړ ته ژمن دي او اطلاعاتو او فرهنګ وزارت د هغو لیکوالانو د کتابونو چاپ کې همکاري کوي چې د چاپ لپاره مالي وس نه لري.
د ننګرهار اطلاعاتو او فرهنګ ریاست د اطلاعاتو آمر قریشي بدلون وايي: « موږ ټولو لیکوالو ته په دې برخه کې ځانګړی سهولیت رامنځته کړی. هغه لیکوال چې کتابونه یې لیکلي، خو د چاپ وس یې نه لري، دلته دې عریضه وکړي او موږ یې کتابونه په وړیا چاپوو.»
مسوولین زیاتوي، د بېلابېلو خپرندویه ټولنو په ملاتړ او همکارۍ پلان لري نږدې وخت کې د کتابونو یو ملي نندارتون په ننګرهار کې جوړ کړي.
قریشي بدلون زیاتوي: « د اطلاعاتو او فرهنګ ریاست په نږدې راتلونکي کې د خپرندویه ټولنو، پوهنتونو او خصوصي کتابتونونو په همکارۍ په ننګرهار کې د هېواد په کچه لوی نندارتون جوړ کړو. دا نندارتون به درې ورځې ادامه ولري.»
په ننګرهار کې د کتاب لوستنې لپاره دا نندارتون داسې مهال جوړ شوي چې څو ورځې وړاندې د اطلاعات او فرهنګ وزارت په دې ولایت کې له لیکوالو سره په یوه ناسته کې دوی ته ډاډ ورکړی و چې د کتابونو د چاپ په برخه کې ورسره همکاري کوي.
