کاهچیني یا له بوسو څخه د هنري اثارو جوړول یو نوی، تخنیکي او معاصر هنر دی چې په کې د بوسو یا وچو وښو له ځلېدونکو ډنډرو څخه د معرق هنر ته ورته نازک او ښکلي تابلوګانې جوړېږي.
د دې هنر یو تن ماهر، عبدالله کاظمي وایي، د کاهچینۍ هنر یې د ښوونځي له دورې زده کړی، خو له تېرو دوو کلونو راهیسې یې په ډېر تمرکز او جدي ډول پرې کار پیل کړی دی. هغه د بوسو په وسیله پر بېلابېلو رنګینو ټوکرونو کلمې او بېلابېل نقشونه جوړوي.
هنرمند عبدالله کاظمي وايي: « کاه چیني هم یو ډول معرق دی. په اصل کې د وښو په وسیله پر یوې ټوټې د ډیزاین کښلو ته ویل کېږي. ما خپله په دې هنر (کاه چیني) نوم اېښی دی، ځکه چې اصلي ماده یې وچ واښه دي.»
د کاهچینۍ هنر په ډېرو ساده امکاناتو لکه د وچو وښو، ټوکر او یو شمېر نورو لومړنیو وسایلو ترسره کېږي. کاظمي له همدې ساده موادو داسې ځانګړي او بې ساري هنري اثار جوړ کړي چې په ټولنه کې ډېر لږ کسان پرې پوهیږي.
نوموړی له اسلامي امارت غواړي چې د دې هنر د پېژندنې، پراختیا او زدهکوونکو ته د ښوونې لپاره یې لازم ملاتړ وکړي.
عبدالله کاظمي زیاتوي: « که چېرې د اطلاعاتو او فرهنګ ریاست پر دې هنر پانګونه وکړي، نه یوازې مادي پانګونه بلکې ښايي هڅول، د اسانتیاوو جوړول او ملاتړ وي، یا هم د کاري زمینې برابرول او نړۍ ته یې معرفي کول.»
که څه هم د معرق کاشۍ او معرق لرګي هنر له پخوا راهیسې د نړۍ په بېلابېلو سیمو کې دود دی، خو د کاهچینۍ یا د بوسو معرق یو نوی نوښت دی چې په افغانستان کې تر اوسه ډېر لږ، یا هم هېڅ پرې کار نه دی شوی.
د هرات سیمهییز مسوولان ژمنه کوي چې له دې نوي راټوکېدلي هنر څخه به په هرات او د هېواد په کچه هر اړخیز ملاتړ وکړي.
د هرات اطلاعاتو او فرهنګ ریاست کې د کلتور او هنر آمر عبدالمتین عادل وايي: « اطلاعاتو او فرهنګ ریاست د هر هغه هنر ملاتړ کوي چې زموږ هېواد وال ورته توجه او پاملرنه کوي. موږ په ځانګړې توګه له هغو هنرونو هر اړخیز ملاتړ کوو چې اوس را ټوکېدلي او خپل ځای یې موندلی دی.»
عبدالله کاظمي د هرات ښار په زړه کې، په یوه تاریخي کاروان سرای کې د کاهچینۍ هنر پر مخ وړي. هغه هیله لري چې د ګڼو زدهکوونکو په روزنې سره به دا هنر په ټول افغانستان او آن له هېواده بهر هم پراخ او ور وپېژني.
