د هرات اختیار الدین کلا کې د لرغوني ساینس او ټکنالوژۍ موزیم پرانستل شو.
مسوولین وايي، په دې موزیم کې د ساینس او ټکنالوژۍ اړوند شاوخوا۷۵۰ بېلابېل اثار نندارې ته وړاندې شوي چې د پخوانیو تمدنونو تخنیکي، علمي ماډلونه او تاریخي وسایل په کې شامل دي.
دا اثار د انساني پوهې د پرمختګ بهیر ښيي او لیدونکو ته د ساینس د تاریخ په اړه ژوره پوهه ورکوي.
اختیارالدین کلا کې د موزیم اړیکو مسوول علي احمد تیموري وايي: « له تېرو ۱۲۰ کالو را په دې خوا د انسان ارتباطي وسایل لکه راډیو، ټلویزیون، ټیلفون او نور په دې کې نندارې ته اېښودل شوي دي.»
مسوولین وايي، د دغو پخوانیو ساینسي هڅو او تجربو له لیدلو سره ځوان سیلانیان او په تېره بیا زده کوونکي لا زده کړو ته هڅول کېږي.
د دوی په خبره، هڅه کوي په راتلونکې کې موزیم لا هم پراخه او بډایه کړي.
د هرات اطلاعاتو او فرهنګ ریاست د کلتور او هنر آمر عبدالمتین عادل وايي: « که څه هم د هرات موزیم د هېواد له بډایه موزیمونو څخه ګڼل کېږي، خو دې سالون د هرات ولایت پر بډاینې نور هم ور زیات کړل او موږ کولی شو په صراحت سره ووایو چې د سیل کوونکو جذب به زیات کړي.»
په ورته مهال، یو شمېر سیلانیان د دې ډول نوښتونو هرکلی کوي او وایي، دا ډول علمي او فرهنګي مرکزونه کولی شي د تېرو نسلونو او لاسته راوړونو په اړه د ځوانانو علمي او فکري وده پیاوړې او هغوی د زده کړې او نوښت پر لور وهڅوي.
د کابل اوسېدونکی احمد تمیم راسخ وايي: « ډېر خوښ یم چې دا موزیم یوځل بیا فعال شو او خلک کولی شي لیدنه ترې وکړي او د خپلو نیکونو په احوال ځان خبر کړي. دا چې موږ په تېر کې څه لرل او اوس څه لرو او موږ څومره تغییر کړی.»
د هرات اوسېدونکی سدیس وايي: « دا موږ ته ډېره د خوشالۍ خبره ده چې دا موزیم بېرته پرانستل شو. باید د دې موزیم ښه ساتنه وشي، ترڅو د نورو ځایونو خلک هم راشي او لیدنه ترې وکړي.»
د یادونې وړ ده چې اختیارالدین کلا د هرات له مهمو تاریخي ابداتو څخه ده او اوس د فرهنګي او علمي فعالیتونو لپاره هم کارول کېږي چې د کارپوهانو په باور دا چاره د تاریخي ځایونو د لا بډایه کېدو سبب ګرځي.
