د کندهار ملي موزیم د دې ولایت د اطلاعاتو او فرهنګ ریاست په انګړ کې په یوه تاریخي ودانۍ کې په معیاري ډول جوړ او پرانستل شو.
د هېواد ملي موزیم مسوولین وايي، دا موزیم د افغانستان د فرهنګي میراثونو د ساتنې او څېړنې موسسي له خوا د۵۰ زره ډالرو په ارزښت جوړ شوی چې د امنیتي کامرو نصب ، لابراتوار، د اثارو ترمیم، د نندارتونونو برخې، د اثارو زېرمتونونه او نورې اړوندې برخې په کې شاملې دي.
ملي موزیم کې د موزیمونو آمر عین الدین صداقت وايي: « د کندهار موزیم په اساسي ډول ترمیم شو چې په کې د امنیتي کمرو برخه، لابراتوار، د اثار ترمیم، نندارتون، د اثار زېرمه تون شامل دي. په دې سره اوس موږ کندهار کې یو معیاري موزیم لرو.»
په ورته مهال، د هېواد اطلاعاتو او فرهنګ وزارت د ملي موزیم رییس وايي، دوی په ټولو ولایتونو کې د تاریخي اثارو د ترمیم او ثبت ترڅنګ، د موزیمونو جوړولو هڅې هم کوي.
اطلاعاتو او فرهنګ وزارت کې د ملي موزیم رییس مولوي صبغت الله عابد وايي: « موږ په ټول افغانستان کې دا کار پيل کړی او په دې د اثارو پاکول، ثبتول، ډېټابېس جوړول او د موزیمونو جوړول شامل دي. ډېر ژره به هر ولایت خپل موزیم ولري.»
د کندهار لیکوالان بیا دا ډول موزیمونه یوازې د تاریخي اثارو د ساتنې ځایونه نه ګڼي بلکې د هېواد د تاریخ، فرهنګ او هویت پېژندنې لپاره یې مهم مرکزونه بولي.
دوی ټینګار کوي چې په موزیمونو کې د تاریخي اثارو نندارې ته اېښودل کولی شي د ځوان نسل د تاریخي او فرهنګي پوهاوي په لوړولو کې مهم رول ولري.
څېړونکی او لیکوال محمد معصوم هوتک وايي: « د افغانستان اولین موزیم د احمدشاه بابا په وخت کې جوړ شو چې خزینة الاشراف ورته ویل کېده. په دې ځای کې به د عتیقه اثارو بېلګې ساتل کېدې.»
لیکوال عبدالقیوم مینه وال وايي: « دا د یوه موزیم د پراخولو لپاره یوه هڅه ده، ترڅو اوسنی نسل د خپل تېر نسل په تاریخ او اثارو خبر شي.»
لیکوال ظاهرجان څرک وايي: « د موزیم یوه ګټه دا ده چې زموږ سیمې ته به سیل کوونکی را جلب کړي، یانې دا چې اقتصادي ګټه هم لري.»
مسوولین دغه راز وايي، د کندهار په ملي موزیم کې دامهال ۱۰ زره د بېلابېلو تاریخي دورو لکه د برونز، یوناني، باختري، کوشاني او بېلابېلو اسلامي دورو تاریخي اثار ساتل کېږي چې له ډلې یې څلور زره ترمیم او ثبت شوي دي.
