د هېواد په ختیځ زون کې د ماشومانو ګوزڼ(پولیو) ضد واکسین په دې کمپاین کې به د ختیځ زون په کچه یو میلیون او ۴۰۰ زره تر پنځو کالو کم عمره ماشومان واکسین شي.
د چارواکو په خبره، د واکسین په دې کمپاین کې به یوازې په ننګرهار ولایت کې ۹۰۰زره ماشومان واکسین شي.
چارواکي دغه راز وایي، د واکسین په دې کمپاین کې به ماشومانو ته د پولیو د څاڅکو ترڅنګ، د ویټامین اې کپسولونه هم ورکړل شي.
د ننګرهار عامې روغتیا رییس امین الله شریف وايي: « په ټوله مشرقي حوزه کې ۱ میلیون او ۴۰۰ زره ماشومانو ته واکسین تطبیقېږي چې له ډلې یې په ننګرهار کې ۹۰۰ زره ماشومان دي. همدارنګه له ۶ میاشتو پورته عمر لرونکو ماشومانو ته وټامین اې کپسول هم ورکول کېږي.»
ختیځ زون کې د کتلوي معافیت ادارې مسوولین بیا وايي، د ویټامین اې له ورکولو څخه موخه دا ده چې د ناروغیو پر وړاندې د ماشومانو جسمي دفاعي سیسټم پیاوړی او همدارنګه د شپې نه لیدلو(شب کورۍ) له ناروغۍ خوندي پاتې شي.
ختیځ زون کې د کتلوي معافیت ادارې آمر ډاکټر حکم خان ګلابزوی وايي: « شاوخوا ۱ میلیون او ۳۰۰ زره تنو هغو ماشومانو ته ویټامین اې کپسولونه ورکول کېږي چې له ۶ میاشتو تر ۵ کالو عمر لري. دغه کپسول د ماشومانو د معافیتي سیسټم په پياوړي کولو، ودې کولو او دغه راز د شب کورۍ په له منځه وړلو کې ډېر رول لري.»
همدارنګه، روغتیايي مسوولینو د دې کمپاین پيلولو مراسمو کې د خبرو پرمهال ویلي چې د پولیو واکسین د پوښښ ساحه تر پخوا ډېره پراخه شوې او دوی هغو ماشومانو ته ځانګړې پاملرنه کوي چې په وروستیو کې د پاکستان پوځي رژیم د توپچي بریدونو له امله بې ځایه شوي.
د دوی په خبره، هڅه کېږي دغه ماشومان له واکسین پاتې نه شي.
د ننګرهار عامې روغتیا رییس په دې اړه وايي: « هغو ساحو ته زموږ ټیمونه مخکې هم ورتلل چې له خپلو مېنو بېځایه شوي، اوس مو دغو ساحو ته نور ټیمونه هم ګومارلي. همدارنګه هغو کسانو ته به هم رسېدنه وشي چې خپلو کورونو ته ستانه شوي. زه ډاډ ورکوم چې هېڅ یو کس به له واکسین پاتې نه شي.»
ختیځ زون کې د روغتیا نړیوال سازمان مسوولینو د معلوماتو له مخې، له تېرو پنځو میاشتو راهیسې یاده حوزه کې د پولیو هېڅ انساني یا محیطي پېښه نه ده ثبت شوې او ټینګار یې کوي چې که ولسونه په دې برخه کې خپله همکاري زیاته کړي، ممکن ختیځ زون له ګوزڼ پاک اعلان شي.
