په ننګرهار کې د درمل جوړونې یوازې یوه کارخونه کې په مستقیم او غیر مستقیم ډول لسګونه کسان په کار بوخت دي.
د دې کارخونې مالک وايي، اوسمهال هېواد کې د درمل جوړونې صنعت د پراختیا په حال کې دی او په ډېرو برخو کې هغه درمل چې وړاندې له نورو هېوادونو څخه را واردېدل، اوس په کور دننه تولیدېږي.
ننګرهار کې د درمل جوړونې د یوې کارخونې مالک نوید مسکینزی وايي: « دا خدای شکر دی اوس افغانستان کې ډېرې فابریکې فعالیت لري. اوس د هغو درملو له ۷۰ تر ۸۰ سلنه د هېواد په داخل کې تولیدوو چې پخوا له نورو هېوادونو وارېدېدل. زموږ تولیدات تضمیني او د ښه کیفیت لرونکي دي.»
د درمل جوړونې برخې متخصصین په کور دننه تولیدونکي درمل د کیفیت له اړخه د ډاډ وړ بولي او وايي، د روغتیا وزارت اړوند معیارونه يې پوره کړي دي.
د درمل جوړونې برخې متخصص الله نواز وايي: « دلته په ټولو سټندردونو او معیارونو برابر درمل تولیدېږي او له کنټرول وروسته بازار ته وړاندې کېږي. له بهره وارېدېدنکي درمل کنټرول شوي نه وي او همدارنګه لارو کې له ګرمۍ او یخنۍ سره هم مخامخېږي.»
په دې کارخونه کې په کار بوخت کارګران بیا هېواد کې د درملو د کارخونو شمېر زیاتېدو ترڅنګ، له هېوادوالو غوښتنه کوي چې په داخل کې له تولید شویو درملو ګټه واخلي.
ننګرهار کې د درمل جوړونې فابریکې کارګر لعل محمد وايي: « خلکو ته مې پیغام دا دی چې د خپلو کارخونو درمل وپېري، ځکه ښه کیفیت او کوالټي لري.»
د درمل جوړونې فابریکې یو بل کارګر لطیف الله وايي: « زه له نورو سوداګرو هم هیله لرم چې خپل هېواد کې پانګونه وکړي او خلکو ته د کار زمینه برابره کړي. دغه راز په خپلو تولیداتو سره د ځان لپاره هم ښه ګټه وکړي.»
په همدې حال کې د عامې روغتیا وزارت مسوولین وايي، اوسمهال نږدې شپږ سوه قلمه درمل په داخل کې تولیدېږي.
مسوولین زیاتوي، د داخلي تولیداتو ملاتړ ته ژمن دي او په دې برخه کې عملي ګامونه هم پورته شوي.
د عامې روغتیا وزارت ویاند ډاکټر شرافت زمان وايي: « د عامې روغتیا وزارت له کورنیو تولیداتو ملاتړ او په تړاو یې همکاري کوي. په دې وروستیو کې د داخلي تولید پر کیفیت کافي کار شوی او دغه راز د تولیدي اقلامو شمېر هم زیات شوی. اوس زموږ په هېواد کې شاوخوا ۶۰۰ قلمه درمل تولیدېږي.»
د عامې ورغتیا وزارت مسوولینو د معلوماتو له مخې، اوسمهال هېواد کې د درملو جوړولو نږدې ۱۳۰ کارخونې فعالې دي چې درمل او طبي تجهیزات تولیدوي.
