عامې روغتيا وزارت په روغتونو کې له مسوولو کسانو غوښتنه کړې چې د مور او ماشوم د مړينې کچې کمولو لپاره هڅې زياتې کړي.
د دې وزارت د تخصصي او ثالثي روغتونونو ریيس وايي، د زېږون پرمهال اړتيا ده چې په واټونو کې مسوول کسان د مور او ماشوم روغتيا ته جدي پاملرنه وکړي، ترڅو په دې توګه د دوی د مړينې ګراف را ټيټ شي.
نوموړی له زېږون وړاندې او وروسته د ميندو لپاره پوهاوی هم اړين بولي او زياتوي چې له زېږون وروسته دې ماشوم د کوچنیو ناروغیو په صورت کې هم روغتون ته ورسول شي.
د عامې روغتيا وزارت د تخصصي او ثالثي روغتونونو ریيس امينالله مومند وايي: « کله چې مسوول کس په واټ کې د ماشوم په زېږون او درملنه کې پوره توجه وکړي، نو د مور او ماشوم د مړینې کچه کمېږي. هغه ناروغۍ چې د زیږون پرمهال مور او ماشوم ته انتقالېږي، که سمه پاملرنه وشي، د دې مخنیوی کېدای شي او کله چې د دې مخنیوی وشي، د مړینې کچه ورسره کمېږي.»
همدارنګه، د عامې روغتیا وزارت د معالجوي طب لوی رییس، ډاکټر وحدت الکوزی د ماشومانو د خوندیتوب او پاملرنې په موخه جوړې شوې غونډه کې د وینا پرمهال په راتلونکي کې د جدي پاملرنې څانګه کې د خدماتو د کیفیت له ښه کېدو خبر ورکوي او زیاتوي: « د عامې روغتیا وزارت د نوې جوړې شوې ملي پالیسۍ له مخې به په راتلونکي کې د جدي پاملرنو برخې د خدماتو په کیفیت باندې کار وشي.»
افغانستان د نړۍ په کچه یو له هغو هېوادونو دی چې د مور او ماشوم د مړینې کچه په کې لوړه ده.
په داسې حال کې چې د ملګرو ملتونو د ماشومانو وجهي صندوق(یونیسف) په روان ۲۰۲۵ کال د دې کچې له لا لوړېدو خبرداری ورکوی، د عامې روغتیا وزارت برعکس ادعا کوي چې افغانستان کې د مور او ماشوم د مړینې کچه تر پخوا ټیټه شوې ده.
