د قطر هېواد الخیریه بنسټ د افغانستان لوېدیځ کې د زون پر کچه د زېږون پرمهال د مور او ماشوم د مړینې مخنیوي او کمولو لپاره یو تخصصي روغتون جوړوي.
د عامې روغتیا وزارت چارواکو د قطر الخیریه بنسټ له استازو سره د دې روغتون جوړولو تړون د لاسلیک پرمهال وویل، د دې روغتون په جوړولو سره به نه یوازې په کندهار بلکې د لوېدیځ زون پر کچه د مور او ماشوم د مړینې کچه راټيټه کړي.
دوی وايي، قطر تر دې وړاندې هم په روغتیايي برخه کې له افغانستان سره مرستې کړې او په دې برخه کې یې د لا ګډې همکارۍ او مالي تمویل غوښتنه وکړه.
د عامي روغتیا وزیر نورجلال جلالي وايي: « زه باور لرم چې د دې روغتون په جوړېدو سره به نه یوازې په کندهار ولایت بلکې په ټوله جنوبي حوزه کې د مور او ماشوم د تخصصي خدماتو اړتیا تر ډېره حده پوره شي. همدارنګه ثالثي روغتیايي خدمتونو ته به د خلکو او کورنیو لاسرسی اسانه شي.»
په ورته مهال، قطري چارواکي ډاډ ورکوي چې د روغتیايي مرکزونو د تمویل لپاره به نورې مرستې هم وکړي.
په افغانستان کې د قطر شارژدافیر مرادیف قاشوتي وايي: « دا پروژه چې د قطر د روغتیا وزارت او خیریه بنسټ له لارې پلې کېږي، په کې به ۴۰۰ بسترونه موجود وي. دا خدمتونه نه یوازې د کندهار ولایت لپاره دي بلکې د افغانستان د جنوب زون ټولو ولایتونو ته به خدمتونه وړاندې کړي.»
د عامي روغتیا وزارت د مسوولینو په خبره، یاد روغتون کې به د مور او ماشوم د درملنې تر څنګ په پنځو نورو برخو کی هم د ناروغانو درملنه کېږي او په عصري وسایلو به سمبال وي.
د عامی روغتیا وزارت ویاند داکټر شرافت زمان وايي: « دا یو داسې روغتون دی چې د مور او ماشوم ترڅنګ به د داخلې څانګې خدمات هم وړاندې کړي. په دې روغتون کې به درملتون، لابراتوار او د جراحۍ خدمتونه هم ترسره کېږي. البته په لوېدیځ زون کې د روغتیايي خدماتو کمښت دی، ځکه دا ساحه انتخاب شوې چې په دې سره د مور او ماشوم لپاره د خدماتو کمښت پوره شي.»
چارواکو دا نه دي ویلي چې په یاد روغتون څومره لګښت راځي، خو زیاتوي چې په دوو پړواونو کې به يې چارې بشپړې شي.
د دوی په خبره، یاد روغتون به په ۱۰ زره متره مربع ځمکه کې جوړ او تر راتلونکو دوو کلونو پورې به يې چارې بشپړې او ګټې اخیستنې ته وسپارل شي.
