هرات کې د سره صلیب نړیوال فډراسیون له خوا افغاني سرې میاشتې ټولنې ته درمل او طبي تجهیزات وسپارل شول.
د یاد فدارسیون مسوولین وايي، په مرسته شویو توکو کې د ۵۰ زره امریکايي ډالرو په ارزښت ۷۰ ډوله بېلابېل طبي توکي او درمل شامل دي.
لوېدیځ زون کې د سره صلیب نړیوال فډراسیون د روغتیا څانګې مسوول خلیل احمد غیاثي وايي:« د سره صلیب نړیوالې کمېټې نن ۸۵۰ کارته درمل چې په کې ۷۰ قلمه طبي مواد او پر خوارځواکۍ اخته ماشومانو د درملنې لپاره له وړاندې چمتو شوي خواړه شامل دي، په هرات کې د سرې میاشتې ولایتي دفتر ته وسپارل. د دې مرستې موخه د سرې میاشتې د وړتیاوو ډېرول او د هغو پر خوارځواکۍ اخته ماشومانو درملنه ده چې له ایرانه لوېدیځ زون ته را ستانه شوي دي.»
د افغاني سرې میاشتې مسوولین دا مرستې مهمې بولي او ټینګار کوي چې دا مرستې به پر راستنو شویو کډوالو ووېشي.
لوېدیځ زون کې د افغاني سرې میاشتې ټولنې حوزوي رییس عبدالبصیر رحماني وايي:« د هرات ولایت له سرې میاشتې ریاست سره دوه موټره درمل چې په کې ۸۵۰ کارته ډول ډول درمل شامل دي، د سره صلیب نړیوالې کمېټې له خوا مرسته شوې. دغه درمل به له ایرانه د راستنو شویو ماشومانو د خوارځواکۍ درملنې لپاره ولګول شي.»
که څه هم راستانه شوي افغانان دا مرستې سمدستي مهمې بولي، خو په همدې حال کې کډوالو ته د سرپناه پر جوړېدو ټینګار کوي.
له ایرانه راستون شوی کډوال وايي: « که راستنو شویو مهاجرینو ته د استوګنې او کاروبار ځایونه جوړ شي، دا به ډېره لویه مرسته وي؛ موږ له دولت همدا غوښتنه لرو.»
له ایرانه یو بل راستون شوی کډوال وايي: « زموږ خدمت کېږي، خو سرپناه نه لرو، موږ ته باید سرپناه جوړه شي.»
دا مرستې داسې مهال ترسره کېږي چې سرپرست حکومت له ایرانه د راستنو شویو کډوالو بهیر ته په کتو پر نړیوالو مرستندویه ټولنو او ملي پانګه والو د ورته مرستو د ترسره کېدوغوښتنه کړې او دا يې د ټولو ګډ مسوولیت بللی.
