روانه اوونۍ د مور په شېدو د تغذیې له نړیوالې اوونۍ سره برابره ده. په همدې تړاو عامې روغتیا وزارت کې ناسته جوړه شوې او په کې د مور په شیدو د تغذیې پر اهمیت او ارزښت خبرې وشوې.
د ماشومانو د ملاتړ لپاره د ملګرو ملتونو وجهي صندوق(یونیسف) استازي امیر حسین یارپرور جوړې شوې ناستې ته وویل، دا مهال ۳.۵ میلیونه افغان ماشومان چې ډېره برخه یې له دوو کلونو کوچني ماشومان دي، پر خوارځواکۍ اخته شوي او یو لامل یې هم ماشوم ته د مور د شېدو نه ورکونه ده.
پرور په افغانستان کې ماشوم ته د مور د شېدو ورکولو کچه څه باندې ۶۳سلنه او همدا کچه په روغتيايي مرکزونو کې یوازې ۵۰ سلنه وګڼه.
هغه په دې اړه وايي: « سره له دې چې ۶۶ سلنه زیږون په روغتیايي مرکزونو کې کېږي، خو د زیږون پرمهال یوازې ۵۰ سلنه بلکې له۵۰ سلنو هم کمو ماشومانو ته د مور شېدې ورکول کېږي. دا د هغو فرصتونو څرګندونه کوي چې کولی شو له زيږون وړاندې مشورې، د زیږون پرمهال تخصصي ملاتړ، په ټولنه کې د پرله پسې تعقیب لپاره ترې ښه ګټه واخلو. د مور شېدې له شپږو میاشتو بشپړې تغذیې وروسته تر ۲۳ میاشتو پورې اصلي خواړه دي. په افغانستان کې شاوخوا ۳.۵ میلیونه ماشومان پر خوارځواکۍ اخته دي.»
بل پلو، د عامې روغتیا وزارت مسوولین وايي، د زیږون له لومړي ساعته تر دوو کلونو پورې د مور له شېدو ګټنه د نس ناستي او د هډوکو کمزورتیا په څېر له وژونکو ناروغیو د مخنیوي ترڅنګ، د ماشوم په فزیکي او ذهني وده کې مرسته کوي.
د دې وزارت چارواکي ماشوم ته د مور د شېدو ورکړه له بنسټیزو حقونو ګڼي او وايي، دا شېدې ماشوم ته تر ټولو مغذي خوارکي توکي دي او د بدن معافیتي سیسټم په لوړولو کې د واکسین رول لوبوي.
د عامې روغتیا وزارت د روغتیايي خدمتونو د وړاندې کولو مرستیال عبدالولي حقاني وايي: « کله چې یو ماشوم د لومړي ځل لپاره نړۍ ته سترګې پرانیزي، له هرڅه وړاندې د خپلې مور غېږ لمس کولو او شېدو ته اړتیا لري. دا شېدې د ژوند لومړنۍ غذا، لومړني درمل او لومړنی واکسین دی. دا شېدې له فطرت سره تړلې دي او د مور له بېساري مینې سره ګډې وي.»
د عامې روغتیا وزارت د چارواکو په خبره، تر دې دمه په هېواد کې د شاوخوا ۲ میلیونه پر خوارځواکۍ د اخته ماشومانو او شاوخوا ۹۰۰ زره ځوارځواکو مېندو درملنه شوې.
په دې تړاو د عامې روغتيا وزارت په یوه اعلامیه کې د مور د شېدو ورکړه نه یوازې د ماشومان بلکې د مور لپاره هم د زیږون د درد په کمولو او د سینې سرطان په څېر د وژونکو ناروغیو په مخنیوي کې مهم بولي.
د عامې روغتیا وزارت د تغذیې برخې رییس حکمت الله معصومي وايي: « په حاده او متوسطه خوارځواکۍ د ۲میلیونه په شاوخوا کې له ۵ کالو کوچنيو اخته ماشومان درملنه شوې؛ دغه راز په حاده خوارځواکۍ د شاوخوا ۹۰۰ زره مېندو درملنه شوې.»
دا داسې مهال ده چې د عامې روغتیا وزارت په ټولنه کې په دې اړه د عامه پوهاوي کچې لوړول مهم اصل ګڼي او په دې برخه کې د مسوولو ادارو، نړیوالو سازمانونو او نړیوالې ټولنې د ملاتړ او همکارۍ غوښتنه کوي.
