د ننګرهار ولایت جلال اباد ښار یو شمېر اوسېدونکي ادعا کوي چې ځینې ځوانان له درملتونو نشه کوونکي درمل او ګولۍ له نسخې پرته اخلي او د نشې لپاره يې کاروي.
دوی وایې، ځینو درملتونو کې د زیګاپ په نامه ګولۍ خرڅېږي چې د ډاکټرانو له سپارښتنې او نسخې پرته يې ځوانان اخلي او د نشې لپاره یې کاروي.
دوی له عامې روغتیا وزارت د دغو ګولیو د پلور بندېدو غوښتنه کوي.
د جلال اباد ښار یو اوسېدونکی وايي:« درملتونونه دا ګولۍ بې له نسخې خرڅوي. موږ له دولت غوښتنه کوو چې د نورو نشه يي توکو ترڅنګ، د دغو ګولیو د فروش مخه ونیسي؛ ځکه چې زموږ ډېر تنکي ځوانان په دې ګولیو روږدي شوي دي.»
د جلال اباد یو بل اوسېدونکی وايي: « درملتونونه د زیګاپ په نوم نشه يي ګولۍ خرڅوي، له دولت غوښتنه کوو چې د دې مخه ونیسي. دا ډېر تاوانونه لري او خلکو ته یې کورنۍ ستونزې جوړې کړې دي.»
په همدې حال کې روغتیا پالان د ډاکټر له مشورې پرته د زیګاپ ګولیو استعمال ناسم ګڼي او وايي، د دې ګولیو زیات کارول د اعتیاد سبب کېږي او جانبي عوارض هم لري.
د رواني ناروغیو ډاکټر میرویس دانش وايي: « دا ګولۍ د اعتیاد سبب کېږي او د بدن د وزن زیاتېدو، د پښو او لاسونو د پړسوب او دغه راز د ګنګسیت او سرګرځېدلو لامل کېږي. همدارنګه د استفراغ، فشار ټیټېدو، تنفسي ستونزو پيدا کېدو او که په اوږدمهاله توګه وکارول شي، کاروونکي ته د ځان وژنې فکر پیدا کوي.»
که څه هم د ننګرهار روغتیا ریاست د دې موضوع په اړه څه نه وايي مګرامنیه قومنداني ډاډ ورکوي چې پر درملتونو او روغتونو څار کوي او هېڅ ډول ناقانونه کړنو ته اجازه نه ورکوي.
د ننګرهار امنیه قوماندانۍ ویاند سید طییب حماد وايي: « یوازې ډاکټرانو ته اجازه شته چې د دې ډول درملو او ګولیو مشخصه اندازه تجویز کړي. بل چا ته د دې درملو د پلورلو اجازه نه شته. امنیتي ځواکونه د دغو درملو پر فروش څارنه کوي.»
دا په داسې حال کې ده چې همدا تېره اوونۍ هم د ننګرهار امنیتي مسوولینو په دې ولایت کې د لسګونه نشه یي ګولیو د نیولو خبر ورکړ.
