هرات کې د هوا له ګرمېدو سره په ماشومانو کې موسمي ناروغۍ د زیاتېدو په حال کې دي.
د دې ولایت حوزوي روغتون مسوولین وایي، په ورځني ډول شاوخوا زر ماشومان د همدې موسمي ناروغانو له امله روغتون ته مراجعه کوي.
د هرات حوزوي روغتون د ماشومانو څانګې آمر میرویس عابدي وايي: « لکه څرنګه چې ما ارزونه وکړه او د تېرې ورځې راپورونه مې وکتل، تېره اوونۍ موږ ته له زرو تنو زیات ماشومان راغلي چې ډېری یې په فصلي ناروغیو اخته دي. په دغو ناروغانو کې یو شمېر په نس ناستي او ډېر یې په تنفسي ناروغیو اخته وو.»
عابدي د موسمي ناروغیو عمده لاملونه د چاپېریال ککړتیا، د فردي حفظ الصحې نه مراعاتول او د روتا ویروس خپرېدل یادوي چې تر ډېره ماشومانو ترمنځ د نس ناستي، تبي او نورو ویروسي ناروغیو لامل کېږي.
عابدي په دې اړه وايي: « هوا اساسي رول لري او زه له ټولو کورنیو غوښتنه کوم چې د خپلو خونو هوا معتدله وساتي، ترڅو ویروسونو ته د رشد زمینه برابره نه شي. همدارنګه والدین باید د خپلو ماشومانو روغتیا او پاکۍ ساتنې ته پاملرنه وکړي. دغه راز، ماشومان باید له زیږون وروسته لومړنیو شپږو میاشتو کې د مور له شیدو تغذیه وکړي.»
بله خوا، د هرات اوسېدونکي د ماشومانو درملنې لپاره د امکاناتو کمښت او د پایوازانو لپاره د انتظار ځایونو له نه شتوالي شکایت کوي او د یادو ستونزو پر حل ټینګار کوي.
د عبدالعظیم په نوم پایواز وايي: « له ناروغانو سره راغلو کسانو ته هېڅ ډول مناسب ځای نه شته، څوک په دهلېزونو، څوک په چمن او برنډو کې پراته دي؛ دا خپله د ناروغیو خپرېدو سبب کېږي.»
د غلام سرور په نوم یو تن ناروغ لرونکی وايي: « هېڅ رسېدنه نه کېږي، نه ډاکټر شته او نه درمل. خپل ټیلیفون مې خرڅ کړ او ماشوم ته مې درمل پرې واخیستل.»
د هرات اوسېدونکی سینګن وايي: « روغتون کې د پایوازانو لپاره ځای نه شته او ټول په تکلیف دي. ډاکټران ښه چلن او خدمت کوي، خو درمل نه شته او موږ یې له بازار په بیه رانیسو. زموږ اقتصاد کمزوری دی او نه شو کولی دغه درمل په پیسو رانیسو.»
هرات کې سږ کال داسې مهال له موسمي ناروغیو شکایتونه زیات شوي چې روغتیا پالان وايي، د هوا په ګرمېدو سره مېکروبونه تر بل هر وخت ډېر فعالیت کوي.
دوی د ورغتیا لپاره ټولو خلکو ته د حفظ الصحې د مراعتولو سپارښتنه کوي.
