د عامې روغتیا وزارت د وینې ملي بانک آمرغوښتنه کړې چې د روژې میاشتې تر پیل مخکې دې خلک د ناروغانو لپاره وینه هدیه کړي.
په ورته مهال د عامې روغتیا وزارت ویاند د هر انسان لپاره د وینې ورکړه ګټوره بولي او پرځوانانو یې غږ کړی چې د نورو هېوادوالو په ژوند ژغورولو کې خپل انساني او افغاني مسوولیت اداء کړي.
د عامې ورغتیا وزارت ویاند ډاکټر شرافت زمان وايي: « قدرمنو هېوادوالو! دا چې د روژې میاشت په را رسېدو ده، زموږ ډېری هغه ناورغان چې عاجل ناروغان دي یا د تلاسمیا پر ناروغۍ اخته ماشومان دي، د روژې په میاشت کې د وینې له کمښت سره مخ کېږي. ډېر کله د روژې په میاشت کې د وینې په بانکونو کې د عاجلو تلاسمیا ناروغانو لپاره د وینې کمښت وي، په دغسې حالاتو کې زموږ له ځوانانو او هېوادوالو هیله دا ده چې له ورژې وړاندې د وینې نږدې بانکونو ته ورشي او خپله وینه هدیه کړي. د دې لپاره چې د خپل یوه هېوادوال ژوند مو ژغورلی وي، مناسبه ده چې د وینې مرکزي یا ولایتي بانکونو ته لاړ شو او خپله وینه اهداء کړو، ترڅو وکولی شو د خپلو اړمنو هېوادوالو ژوند وژغورو.»
له بلې خوا، د ننګرهار حوزوي روغتون د وینې بانک مسوول ډاکټر نورزاد همت هم پر هېوادوالو غږ کړی چې د روژې له پيل وړاندې خپله وینه اهداء او د اړمنو هېوادوالو ژوند وژغوري.
همت زیاته کړې:« زه له ټولو ځوانانو، هېوادوالو او هغو کسانو چې د وینې ورکولو په شرایطو برابر دي غوښتنه کوم چې د وینې له کمښت سره مخامخ ناروغانو، په تلاسمیا اخته ماشومانو او هغو مېندو سره د مرستې لپاره وینه ورکړي چې د زیږون پرمهال یا هم له زیږون وروسته وینې ته اړتیا پیدا کوي. که څوک له روژې وړاندې د وینې ورکولو فرصت نه لري، کولی شي له روژه ماتي وروسته هم وینه ورکړي. زموږ د وینې بانکونه هرځای فعال دي.»
همدارنګه د وینې ملي بانک مسوول سیف الرحمان پښتون وايي،هر څوک چې روغتیا ولري او د وینې ورکولو جوګه وي، کولی شي په مرکز او ولایتونو کې د وینې بانګ ته مراجعه وکړي او خپله وینه اهداء کړي.
پښتون زیاتوي:« زما له ټولو ځوانانو او هغو کسانو چې کولی شي وینه ورکړي غوښتنه دا ده چې باید په کابل او ولایتونو کې د وینې مرکزي او فرعي بانکونو ته مراجعه وکړي او خپله وینه دې اهدا کړي. د وینې ملي بانک خدمات په ۳۴ ولایتونو کې ۲۴ ساعته خدمتونه لري.»
د وینې ملي بانک مسوول پر هغو کسانو چې وینې ته اړتیا لري هم غږ کوي چې د اړتیا پرمهال د وینې مرکزي بانک او نورو څانګو ته مراجعه وکړي او په وړیا توګه وینه ترلاسه کړي.
