د عامې روغتیا وزارت ویاند ډاکټر شرافت زمان وايي، د ژمې له پیل راهيسې تر اوسه پورې د هېواد پر کچه د ګاز نيونې له امله ۸۹۴ تنه روغتيايي مرکزونو ته ور وړل شوې چې له دې ډلې ۲۴ تنو خپل ژوند له لاسه ورکړی.
شرافت زیاتوي چې په مړو شويو کسانو کې ۱۵ تنه نارينه او ۹ ښځې شاملې دي.
هغه په دې اړه وايي: « په ۱۴۰۳ هجري شمسي کال کې د ټول هېواد پر کچه زموږ روغتیايي مرکزونو ته د ۸۹۴ تنو په شاوخوا کې هغه هېوادوال راوړل شوي چې د ګاز نیولې له امله مسموم شوي وو. د تېر کال په پرتله، سږ کال د ګاز نیونې واقعات څه زیات دي او بدبختانه زموږ ۲۴ تنو هېواد والو له دې امله ژوند له لاسه ورکړی. له ټولو هېوادوالو مو غوښتنه هم دا ده چې د ګازي بخاریو د کارولو پرمهال له احتیاطي تدابیرو کار واخلي. هغه احتیاطي تدابیر چې د عامې روغتیا وزارت له لوري او همدارنګه د نورو ادارو له خوا له ولسونو سره شریک کېږي، له خلکو مو غوښتنه ده چې دا تدابیر عملي کړي، ترڅو دوی او د دوی کورنۍ خوندي پاتې شي.»
روغتیا وزارت دغه شمېرې د ټول هېواد پر کچه یادوي او سپارښتنه کوي چې د ګازي بخاریو د استعمال پرمهال دې له احتیاط کار واخیستل شي.
