د ننګرهار اوسېدونکي په دغه ولایت کې د یوه داسې مجهز روغتون د جوړېدو غوښتنه کوي، چې په کې پر سرطان د اخته ناروغانو درملنه وشي.
د دوی په خبره بهرنیو هېوادونو د سرطان درملنې لپاره د تګ توان نه لري او پر دې سربېره د وېزو او پاسپورټونو په برخه کې هم وخت نا وخت ستونزې وي، چې له امله یې ډېری ناروغان خپل ژوند له لاسه ورکوي.
د ننګرهار ولایت یو تن اوسېدونکی خان محمد وايي:« مخکې به یې ټوکنې ورکولې، اوس هغه ټوکن هم بند شوي او پاکستان ته تګ لویه ستونزه ده، نو که د سرطان ناروغۍ لپاره ننګرهار کې روغتون جوړ شي، د خلکو لپاره به ډېرې اسانتیاوې وي، درملنه به یې په اسانۍ سره کېږي، ځکه چې خلک ډېر غریب دي، نه د پاسپورټ او نه د وېزو وس لري، ټوکن هم بند دي.»
د ننګرهار ولایت یو بل اوسېدونکی ستانکزی بیا وايي:« خلک غریب دي، ستونزې زیاتې دي، نه شي کولی بهر ته ولاړ شي. نو که درملنه یې دلته وشي، ډېره به ښه وي.»
په ورته وخت کې د ننګرهار عامې روغتیا ریاست چارواکي په دغه ولایت کې د سرطاني ناروغانو د درملنې په موخه په راتلونکي کې د ۵۰ بستریز روغتون د جوړېدو خبر ورکوي.
دوی وايي، د عامې روغتیا وزارت لخوا دغه روغتون منظور شوی او په خبره يې ورته د ځای له تثبيت وروسته به يې عملي کارونه پيل شي.
د ننګرهار عامې روغتیا رییس امین الله شریف وايي:« وزارت تشکیل رالېږلی، د ننګرهار ولایت لپاره ۵۰ بستره تشکیل منظور شوی. موږ اوس مهال په دې اړه هڅه کوو، چې د دې لپاره ځای پیدا کړو، هم موږ او د وزارت له لوري هڅه روانه ده، چې دې ته موږ تعمیر پیدا کړو، وسایل پیدا کړو، تاسو ته مالومه، چې دا قیمتي وسایل غواړي. انشاء الله دا کار منظور شوی، خدای مهربانه دی، چې په لنډ وخت کې به دا کار بشپړ شي.»
دا په داسی حال کې ده، چې اوس مهال افغانان د سرطاني ناروغانو د درملنې لپاره له هېواد بهر ځي، چې هم په ډېره اندازه لګښت ترې کېږي او هم د تګ راتګ پرمهال د وېزو او پاسپورټونو برخه کې له ستونزو سره مخ وي.
