د امریکا په پنسلوانیا ایالت کې د پخواني ولسمشر او د راتلونکو ولسمشریزو ټاکنو نوماند ډونالډ ټرمپ، په یوه وسله وال برید کې ټپي شوی دی.
دغه پېښه د یاد ایالت په بټلر سیمه کې هغه مهال رامنځته شوې، چې نوموړي په یوه ټاکنیزه غونډه کې د خپلو زرګونه پلویانو په منځ کې وینا کوله.
د دغه هېواد فدرال ادارې له قوله وسله وال بریدګر ۲۰ شل کلن ټوماس مټیو کروکس نومېږي، چې د پنسلوانيا ایالت اوسېدونکي دی او د نوموړي له لوری فاير شوې مرمۍ ډونالډ ټرمپ د غوږ په یو برخه لږېدلې.
بریدګر د پولیسو په ځوابي ډزو کې وژل شوی او د یوه بل تن پر وژل کېدو سربېره په دې پېښه کې دوه تنه نور چې د غونډې ګډونوال بللی کیږي، ټپیان دي.
روغتون ته تر لېږدېدو څو ساعته وروسته ټرمپ په یوې اعلامیې کې له امنیتي مسوولینو څخه د دې پېښې د ښه مدیریت له کبله مننه کړې او دغه پېښه یې حیرانوونکې بللې.
هغه زیاته کړې:« تر هر څه د مخه زه غواړم په دې پېښه کې د وژل شوي کس او د ټپیانو کورنیو ته خپل د خواخوږۍ مراتب وړاندې کړم. دا ډېره هېښوونکې ده، چې ورته پېښې دې د امریکا په څېر هېواد کې ترسره شي.»
دې پېښې ګڼ غبرګونونه راپارولي.
د امریکا ولسمشر جوبایډن پر خپل ټاکنیز سیال وسلهوال برید غندلی او ویلي يې دي، چې د امریکا په هېڅ ځای کې ورته تاوتریخوالي ته اجازه نه ورکوي.
نوموړی په یوه خبري کنفرانس کې د ورته کړنو د مهار لپاره د امریکايي سیاستوالو ترمنځ پر یووالي ټینګار کړی او ویلي يې دي، هېڅوک باید په ورته پېښو سترګې پټې نه کړي.
هغه زیاتوي:« د ورته تاوترېخجنو کړنو لپاره په امریکا کې هېڅ ځای نشته. دا بده ده او له همدې کبله موږ باید دغه هېواد متحد کړو. موږ نه شو کولیی ورته کړنو ته د پېښېدو اجازه ورکړو. موږ باید داسې ونه اوسو. موږ نه شو کولی په دې پېښو سترګې پټې کړو.»
د اروپايي کمېسیون مشر سره له دې چې ویلې يې دې پېښې سخته حیرانه کړې، زیاته کړې يې ده، چې سیاسي تاوتریخوالی په ډېموکراسۍ کې هېڅ ځای نه لري.
په ورته مهال د ملګرو ملتونو ویاند د دې سازمان د سرمنشي له قوله په یوې خپره شوې اعلامیه کې دغه پېښه غندلې او سیاسي تاوتریخوالی یې بللی.
د خبرپاڼې یوه برخه:« د ملګرو ملتونو سرمنشي په واضح ډول ورته سیاسي تاوترېخوالی غندي. نوموړی د ولسمشر ټرمپ د ژر تر ژره سلامتیا لپاره هېله څرګندوي.»
بل پلو یاده پېښه د کانادا، برېټانیا، هند او جاپان په ګډون د ګڼو هېوادونو د مشرانو له لوري غندل شوې او سیاسي تاوتریخوالی یې د ډېموکراسۍ او حکومتوالۍ لپاره د نه منلو کړنه بللې.
د فرانسې ولسمشر اېمانوېل مکرون بیا ډونالډ ټرمپ د ترور د ناکامې هڅې قرباني بللی او دغه پېښه یې د ډېموکراسۍ لپاره تراژیدي بللې.
ماکرون زیاته کړې:« زما فکر د ترور د هڅې له قرباني ولسمشر ډونالډ ټرمپ سره دی. زه د هغه د سملاسي روغتیا هیله لرم. په دې پېښه کې د غونډې یو ګډونوال وژل شوی او څو نور ټپیان دي. دا د ډېموکراسۍ لپاره یوه تراژیدي ده.»
د امریکا فدرال ادارې ویلي، دغه پېښې د پخواني ولسمشر ډونالډ ټرمپ د ترور هڅې په تور څېړي.
دا پېښه داسې مهال رامنځته کېږي، چې ټاکل شوې شاوخوا پنځه میاشتې وروسته او د روان کال په نومبر کې ډونالډ ټرمپ له اوسني ولسمشر جوبايډن سره په ولسمشریزو ټاکنو کې سيالي وکړي.
