د تهران او واشنګټن ترمنځ د ناندریو او توندو بیانونو له تبادلې وروسته، ایران د اسلام اباد په دویم پړاو خبرو کې ګډون رد کړ.
د ایران بهرنیو چارو وزارت ویلي، دوی په پام کې نه لري چې له امریکا سره د دویم پړاو خبرو کې د ګډون لپاره اسلام اباد ته خپل مرکچي ټیم واستوي.
د ایران بهرنیو چارو وزارت ویاند اسماعیل بقايي په خبره، ایران د اسلام اباد په خبرو کې ګډون نه کوي، خو زیاتوي چې که امریکا خپل استازي اسلام اباد استوي، دا د دوی خپله ستونزه ده.
بقايي دغه راز ویلي: « موږ د خبرو په دویم پړاو کې د ګډون لپاره اسلام اباد ته نه ځو او دا دریځ مو روښانه بیان کړی. دا چې امریکا لا هم خپل ټیم اسلام اباد ته استوي، دا د دوی خپله ستونزه ده او دا ښايي د کوم بل هدف لپاره وي. موږ په دې خبرو کې ګډون نه کوو.»
ایراني چارواکي دغه راز وايي، دوی د ګواښونو تر سیوري لاندې مذاکرات نه مني او دوی له تېرو دوو اوونیو راهیسې چمتوالی نیولی چې د جنګ په ډګر کې نوي کارټونه وښیي.
د ایران پارلمان مشر او جګپوړي مرکچي محمد باقر قالیباف ویلي، ټرمپ غواړي د کلابندیو او له اوربند څخه د سرغړونې له لارې د جنګ اور ته لمن ووهي.
قالیباف پر خپله اېکس پاڼه لیکلي: « ټرمپ د کلابندۍ او اوربند ماتولو له لارې غواړي د خبرو اترو مېز د تسلیمۍ په مېز بدل کړي، یاهم د جګړې بېرته پيل ته بهانه جوړه کړي. موږ د ګواښونو تر سیوري لاندې مذاکرات نه منو. موږ په تېرو دوو اوونیو کې د جګړې په ډګر کې د نویو کارټونو ښودلو ته چمتوالی نیولی.»
له بلې خوا، د امریکا ولسمشر ډونالډ ټرمپ پر تهران تور پورې کړی چې څو څو ځله یې له اوربند څخه سرغړونه کړې. تهران د ټرمپ دې تورونو ته په ځواب کې ویلي، دا ادعا بې بنسټه ده او ټرمپ دروغ وايي.
د تهران او واشنګټن ترمنځ د تورونو تبادلې د سیمې په کچه ځینې ژورې اندېښنې زیږولې دي.
د قطر بهرنیو چارو وزارت ویاند خبري ناستې ته خبرو کې د یوې پوښتنې په ځواب کې ویلي، دوی نه غواړي د دغو مذاکراتو د ناکامۍ په اړه خبرې وکړي.
د هغه په خبره، یوازې قطر نه بلکې ټوله نړۍ د دغو مذاکراتو ملاتړ کوي.
ماجد انصاري زیاته کړې: « قطر د یوه هېواد په توګه له دغو مذاکراتو بشپړ ملاتړ او د پاکستان د هڅو ستاینه کوي. له همدې مذاکراتو سره په تړاو ، موږ په مسلسله توګه له پاکستان سره په اړیکه کې یو. دلته نه غواړم د دغو مذاکراتو د ناکامېدو په تړاو خبرې وکړم، ځکه ټوله نړۍ د دغو مذاکراتو ملاتړ کوي.»
له بلې خوا، پاکستان هم د تهران او واشنګټن ترمنځ د بیانونو له تبادلې اندېښمن شوی او د اسلام اباد په منځګړیتوب د خبرو دویم پړاو ناکامېدو له وېرې یې یو ځل بیا چین ته مخه کړې.
داسې ښکاري چې چین هم دا ځل غلی پاتې شي او دې خبرې په اسلام اباد کې د پلان شویو مذاکراتو پر برخلیک سیوری غوړولی.
د شنونکو په باور، د تهران او واشنګټن ترمنځ اساسي ستونزه د ایران اټومي پروګرام دی چې امریکا یې د خبرو اساس بولي، خو اوس د هرمز تنګي برخلیک هم هغه څه دي چې په اړه یې د تهران او واشنګټن نظرونه ډېر زیات واټن لري.
