کندهار کې د ګول سیخونو او ګاډرو د تولید یوه فابریکه په ۲۴ ساعتونو کې شاوخوا۴۰ ټنه ګول سیخونه تولیدوي او نږدې۱۵۰ کسانو ته یې د کار زمینه برابره کړې.
د فابریکې مسوولین وایي، که اړتیا وړ برېښنا ورته برابره شي، تولیدات به یې لا زیات شي.
د فابریکې مسوول تورجان فضلي وايي: « موږ اوس له ۴۰ تر ۵۰ ټنو تولید لرو، خو که د اړتیا وړ برېښنا ولرو، موږ تر سل ټنو تولید کولی شو. دلته له ۸ ملي نیولې تر ۳۲ ملي مترو ګول سیخونه تولیدېږي.»
له بلې خوا، د کندهار د صنعت او کانونو خونه وایي، سوېلي حوزه د ګول سیخ په تولید کې ځان بسیاینې ته رسېدلی او په کندهار کې تولیدېدونکی ګول سیخونه او ګاډر د نړیوالو معیارونو سره سم جوړېږي.
د مسوولینو په وینا، ټاکل شوې چې په راتلونکو اتو میاشتو کې فابریکو ته کافي برېښنا برابره شي.
د صنعت او کانونو خونې مسوول سید سرور اماني وايي: « د برېښنا مسوولینو ژمنه راکړې چې د څو میاشتو په تېرېدو سره به کندهار کې دومره برېښنا ولرو چې د اړتیا له کچې به هم ډېره وي. موږ به که خدای کول راتلونکو ۸ میاشتو کې کافي برېښنا ولرو. همدارنګه دا مهال د کجکي برېښنا بند له اوبو ډک دی او تر هغه وخت به موږ ته برېښنا راکړي.»
په دې فابریکو کې کارکوونکي له خپل کار څخه خوښ دي او وایي، که حکومت صنعتکارانو ته نورې اسانتیاوې برابرې کړي، نو ډېر خلک به د صنعت په برخه کې په کار بوخت شي.
هغوی همداراز له سوداګرو غواړي چې نورې فابریکې هم جوړې او فعالې کړي.
د فابریکې کارکوونکی عبدالحکیم وايي: « موږ دلته په دې فابریکه کې د ملي متر په اندازه مختلف ډولونه ګول سیخونه جوړوو. زموږ جوړ سیخونه له کندهار سربېره نورو ولایتونو ته هم ځي.»
د فابریکې کارکوونکی شریف الله وايي: « زه پخوا وزګار وم، خو اوس دلته راته د کار زمینه برابره شوې او زه له دې ډېر خوښ یم. زه له نورو سوداګرو او شتمنو خلکو هم غواړم چې دا ډول کارخونې جوړې کړي، ترڅو زموږ زرګونه وزګار ځوانان په کار شي.»
په تېرو دوو لسیزو کې د افغانستان صنعتکارانو له ګڼو ستونزو او ننګونو سره توانېدلي چې د هېواد یو شمېر اساسي اړتیاوې په کور دننه تولید کړي، خو د برېښنا کمښت او د مناسب ځای نه شتوالی لا هم د صنعت د ودې پر وړاندې له لویو خنډونو شمېرل کېږي.
