مزار شریف ښار کې پر لویو لارو او عامه ځایونو کې د اسلامي امارت د مشرتابه ۱۷مه ګڼه فرمان د خپرولو لړۍ پیل شوه.
دا فرمان په خوښیو او ودونو کې د ناوړه دودونو؛ د مړي د تکفین، تدفین او فاتحې مراسمو او همدارنګه له حج او عمرې څخه د راستنېدلو پر مهال، د ناسمو دودونو مخنیوي په موخه صادر شوی.
د دې پروګرام له مخې به د فرمان مادې د بنرونو او بېلبورډونو په بڼه په عامه ځایونو او لویو لارو کې ولګول شي. دا لړۍ د چارو عمومي ادارې له لوري عملي کېږي.
د چارو عمومي ادارې ریاست د مطبوعاتو مرستیال امین الله جیلاني وايي: « دغه فرمان چې د ټولنیزو چارو د اصلاح، اسلامي او اخلاقي ارزښتونو د پياوړتیا په موخه صادر شوی، د خلکو له هرکلي سره مخ شوی. د چارو ادارې مطبوعاتي ټیم، د دېوالونو پرمخ د خطاطۍ په کښلو، لوحو نصبولو او دغه راز د عامه پوهاوي ناستو جوړولو له لارې، د دې فرمان مادې خلکو ته روښانه کوي. دغه فعالیتونه د مراز شریف ښار په مختلفو برخو او ولسوالیو کې ادامه لري.»
همدارنګه، پر دېوالونو او عامه ځایونو لیکنه هم د دې پروګرام یوه برخه ده. یو شمېر مزار ښاریان د دې اقدام هرکلی کوي او له مسوولینو یې د بشپړ تطبیق غوښتنه کوي.
قومي مشر حاجي حبیب الله جبارخېل وايي: « موږ د امیرالمؤمنین له دې فرمان څخه هرکلی کوو. په دې فرمان کې هغه رسم او رواجونه منع شوي چې شرعي اړخ یې نه درلود. موږ خپله مخور او سپین ږیري کسان راټول شوي او د دې رواجونو د مخنیوي غوښتنه مو کړې.»
د بلخ اوسېدونکی احمد نوید وايي: « هغه غلط او ناسم رواجونه چې اوس مهال زموږ په ټولنه کې دود شوي، باید له منځه یوړل شي. زموږ خلک په ودونو کې ډېر زیات درانه لګښتونه کوي. د زوم کورنۍ د ناوې کورنۍ له خوا مجبوره کېږي چې دا درانه لګښتونه وزغمي. دا باید له منځه لاړ شي.»
د اسلامي امارت مشرتابه په ۱۷ مه ګڼه فرمان کې تر ډېره د ودونو، نکاح، تدفین او حج په مراسمو کې له بېځایه لګښتونو څخه د مخنیوي او غیر ضروري مراسمو څخه پر ډډه کولو ټینګار شوی.
د یادونې وړ ده چې دا پروګرام به په نورو ولایتونو کې هم عملي شي.
