د کندهار میرویس حوزوي روغتون د ماشومانو څانګه کې دا مهال په شدیدې خوارځواکۍ لسګونه اخته ماشومان بستر دي.
د کندهار اوسېدونکې نجیبه وايي:« د دې ماشوم مور شیدې نه لرلې، یوازې دوه درې میاشتې یې ورکړې. بیا مو د قطیو پوډري شیدې ورکولې خو له هغې وروسته مو پخې اوبه او چای ورکاوه. مور یې ناروغه ده او دی به یخ ته ناست او ژړل به یې. همدارنګه مور یې بل کوچنی هم په نس شو او په دې سره د دې ماشوم ژوند برباد شو.»
د هلمند اوسېدونکي تورپېکۍ وايي: « د دوو کالو دی او ناببره له خولې اېله شو. تر نن مو ورسره وهلې نه یې ناروغي ښکاري، نه یې درمل ښکاري او نه جوړېږي.»
کندهار د هېواد یو له هغو ولایتونو دی چې هرکال په کې زیات شمېر ماشومان او ښځې د اقتصادي او نورو ستونزو له امله پر خوارځواکۍ اخته کېږي.
په کندهار کې د میرویس حوزوې روغتون د ماشومانو څانګې مشر ډاکټر هدایت الله حکیمي وايي، دوی ته د تلې (میزان) میاشت کې ۱ زر۲۸۴ تنه پر خوارځواکۍ اخته ماشومان را وړل شوي چې له ډلې يې ۱۲۵ په شدیدې خوارځواکۍ اخته ماشومان بستر شوي او پنځو تنو یې ژوند بایللی.
د حکیمي په خبره، په میرویس روغتون کې پر خوارځواکۍ د اخته ماشومانو شمېر ځکه زیات شوی چې دوی ته د کندهار تر څنګ د ۱۳ نورو ولایتونو ناروغان هم مراجعه کوي.
هغه په دې اړه وايي:« په کندهار کې ځکه ډېر دي چې دلته له ګاونډیو ولایتونو یانې ۱۳ ولایتونو ناروغان راځي، مهاجران هم شته او بل د کندهار نفوس ورځ تر بلې ډېرېږي او خلک له اطرف مرکز ته راځي. له دې امله چې دلته ګڼه ګوڼه ډېره ده، پر خوارځواکۍ اخته ماشومانو شمېر هم ورسره ډېر دی.»
له بلې خوا، د میرویس روغتون د ثبت او راجسټر څانګې مسوولین وايي، دغه روغتون ته په تېرو شپږو میاشتو کې ۵ زره ۵۰۹ تنه پر خوارځواکۍ اخته ماشومان ور وړل شوي چې له ډلې يې ۱ زر۲۸۵ تنه پر شدیدې خوارځواکۍ اخته ماشومان بستر شوي هم دي.
د میرویس حوزوي روغتون د ثبت څانګې مسوول محمد اشرف کیهان وايي: « میرویس حوزوي روغتون سره په تېرو شپږو میاشتو کې ۵ زره ۵۰۹ تنه ثبت شوي چې له ډلې یې ۱ زره ۲۸۵ تنه د ماشومانو په څانګه کې بستر شوي دي.»
دا په داسې حال کې ده چې د سرې میاشتې او سره صلیب نړیوال فډراسیون د تېرې اکټوبر میاشتې په ۲۱مه پر خپله اېکس پاڼه د یوه ګډ راپور په خپرولو سره وویل، په افغانستان کې د ماشومانو، مېندواره او شېدې ورکوونکو ښځو د خوارځواکۍ کچه په شدت لوړه شوې چې تر ټولو زیاتې پېښې يې په کندهار او پکتیکا ولایتونو کې دي.
