د کندهار میرویس حوزوي روغتون ماشومانو څانګې ته په سلګونه ماشومان د اسهالاتو د درملنې لپاره ور وړل شوي دي.
د ناروغو ماشومانو مېندې وايي، د پوډري شېدو، د څښاک صحي اوبو او روغتیايي خدمتونو ته د نه لاسرسي له امله د دوی ماشومان ناروغه شوي دي.
د یوه ناروغ ماشوم مور وايي: « دا خو داسې ده چې زموږ اقتصاد ضعیفه دی، ډېر څه ته لاسرسی نه لرو، په دښتو کې ژوند کوو، چې هلته د څښلو لپاره پاکې اوبه نه لرو، داسې خوراک او شیان نه لرو د مسکینۍ ژوند دی. خپلې شېدې مې وچې دي د بزې شېدې ورکوم یا له یوه کوره د غوا شېدې راوړم ورکوم یې نو همدا ده چې ناروغ شو.»
یوه بله مور بیا وايي: « نو دغه د غریبۍ ژوند دی، د دوا وسه یې نه لرو چې ناروغ شي را ویې ځغلوو روغتون ته او ټول په همدې نس ناستي ناروغۍ باندې اخته دي.»
لکه څنګه چې د اوړي په موسم کې د هوا تودوخه لوړېږي، د ماشومانو د بدن اوبه کمېږي، د اسهال نښې ډېرېږي او په پایله کې یې درملنه ستونزمنه کېږي.
د کندهار میرویس حوزوي روغتون د ماشومانو د څانګې مشر ډاکټر عنایت الله حکیمي وايي، په تېره یوه میاشت کې ۲۹۰ د اسهالاتو په ناروغۍ اخته ماشومان دوی ته راوړل شوي، چې دا شمېر په راتلونکو ګرمو میاشتو کې نور هم ډېريدای شي.
د هغه په وينا، نظافت ته نه پاملرنه او د څښاک پاکو اوبو ته د ماشومانو د والدينو نه لاس رسی په ماشومانو کې د نس ناستي ناروغۍ د زياتوالي لاملونه دي.
حکیمي زیاتوي: « په تېره میاشت کې موږ ۲۹۰ ناروغان بستر درلوده او همدارنګه د ۵۰۰ په شاوخوا کې مو ناروغان په سراپا بڼه کتلي دي. نس ناستی داسې یوه ناروغي ده چې دا نظافت ته نه پاملرنې، روغتیايي تاسیساتو ته د خلکو نه لاسرسي او داسې نورعمده عوامل لري.»
هر کال په کندهار کې د اوړي د ګرمۍ له پيلېدو سره په ماشومانو کې د اسهال ناروغي هم زياتېږي او د نس ناستې لسګونه ناروغان د ښار مرکزي روغتون ته له ولسواليو او لرې ځايونو څخه د درملنې لپاره راوړل کېږي.
