په سویل کې د پکتیا ولایت په مرکز ګردیز او ولسوالیو کې د دوشنبې پر ورځ د « ۱۴۰۱ کال د غبرګولې پر ۲ مه» د دوو جلا کمېسیونونو له لارې د تاریخ تیرو خوراکي توکو او درملو راټولولو کمپاین پیل شو.
د دغه کمپاین پیل د څمکنیو ولسوالۍ له بازار وشو او ۱۰ ټنه خوراکي توکي او غیر الکولي مشروبات را ټول او وسوځول شول.
د څمکنیو ښاروالۍ استازی فضل الرحمن جلالي وايي:« لس ټنه خوراکي توکي او غیر الکولي مشروبات مو د څمکنیو له بازار راټول او نن مو وسوځول. راتلونکي کې به هم دغې چارې ته دوام ورکوو او د پلور مخه به یې نیسو.»
د څمکنیو ولسوالۍ جنایي مدیر صابر جان بیا وايي:«موږ ورسره همکار یو،دوی باید مسلکي کسان راولي،چې له بازار تاریخ تیر خوراکي توکي او درمل چې استعمال یې د انسانانو له ژوند سره لوبې کول دي، وخت پر وخت یې را ټول کړو.»
خو پکتیا اوسېدونکي بیا وايي،تر هغې چې پټان ګمرک کې د توکو د کیفیت تضمین لابراتوار نه وي فعاله شوی،له پاکستان او پښتونخوا به د ټیټ کیفیت خوراکي توکي او درمل را واردیږي او پر خلکو به پلورل کیږي .
د پکتیا یو تن اوسېدونکی وايي:« له لابراتوار پرته د ټیټ کیفیت درملو او خوراکي توکو د راوړلو بندیدل ناممکن دي.غوښتنه مو دا ده،چې دغه لابراتوار دې فعاله شي.»
