د یونیسف په مالي ملاتړ او د ریلیف نړیوالي موسسې په تخنیکې ملاتړ د هلمند ولایت د نږدې ټولو ولسوالیو ١٢٣ روغتیایې مرکزونو ته طبي توکي او وسایل وېشل کېږې.
په دغو وسایلو کې ١٦ موټر سایکلونه، د عملیاتونو مېزونه او د مانیټرونو په ګډون یو شمیر نور اړین طبي توکي موجود دي.
د ریلیف نړیوالې موسسې مسوول فهیم الدین فهیم وايي: « تقریبا ً ۳۶ قلمه توکي پېرل شوي چې اړتیا ته په کتو به په ټولو روغتیايي مرکزونو ووېشل شي. د مثال په توګه، د جراحۍ عملیاتو مېز او د انستېزي ماشین روغتونونو ته ځانګړي شوي او د ولسوالیو روغتونونو ته ورکول کېږي؛ مګر ځینې داسې وسایل دي چې موږ یې ۱۲۳ مرکزونو کې د هغوی اړتیاوو ته په کتو ورکوو. د دغو وسایلو مجموعي لګښت له ۸.۵ تر ۹ میلیونه افغانیو دی.»
د هلمند سیمه ییز مسوولین روغتیایي مرکزونو ته د یادو طبي وسایلو وېش خورا مهم ګڼي او په یاده برخه کې د لا زیاتې همکارۍ غوښتنه کوي.
د هلمند ولایت مقام استازی حبیب الرحمن ممتاز وايي: « امارت لګیا دی چې ولس ته هر اړخیز خدمتونه وړاندې کړي؛ که دا انکشافي برخه وي، که ستونزې یا اصلاحات. امارت تر اوسه توانېدلی چې په خپله داخلي بودیجه د ولس اقتصادي ستونزو ته حل لارې پيدا کړي.»
د هلمند د عامې روغتیا ریاست ځای ناستی سردارمحمد قاصد وايي: « ځینې ستونزې وې، خو د عامې روغتیا وزارت له خوا د یونیسف او نورو مرستندویه ټولنو په ملتیا ورته رسېدنه شوې. دلته ځینې طبي تجهیزات پېرل شوي او ټولو کلینیکونو ته به ورسول شي.»
د هلمند اوسېدونکي په دې ولایت کې روغتیایي اړتیاوو ته په کتو وایي، یادې مرستې دغو مرکزونو ته بسنه نه کوي او له مسوولینو د لا زیاتو روغتیایي خدماتو ترسره کېدو غوښتنه کوي.
د هلمند اوسېدونکی مولوي اقا محمد وايي: « موږ د دې کار لپاره له دوی مننه کوو، خو لکه څرنګه چې تاسو پوهېږئ، هلمند ډېره پراخه اراضي او ګڼ نفوس لري، ولسوالۍ یې له مرکز لرې دي او دا وسایل ورته ډېر کم دي.»
د هلمند یو بل اوسېدونکی لعل محمد وايي: « دا طبي توکي ډېر ښه دي، خو د هلمند لپاره بسنه نه کوي. زما په نظر، شاید ۱۰ په ۱۰۰ کې ستونزې حل کړي، خو موږ غوښتنه کوو چې دا ډول طبي سامانونه نور هم هلمند ته راوړل شي.»
د هلمند د عامې روغتیا ریاست د مالوماتو له مخې، په دې ولایت کې شاوخوا ٣٠٠ روغتیایي مرکزونه شته چې چارې یې د حکومت او موسسو له لوري پرمخ وړل کېږي.
د مالوماتو له مخې د پخوا په پرتله ٤٠ سلنه روغتیایي خدمات زیات شوي دي.
