هرات کې د روغتیايي خدمتونو معیاري کولو او په دودیز ډول د نسخو لیکلو په ځای د کمپیوټري نسخو کارولو لړۍ پیل شوه.
مسوولین وایي، په لومړي پړاو کې یو شمېر لویو روغتونونو دغه سیسټم پلی کړی او ډېر ژر به د هرات ښار ټول ۱۵۰ روغتیايي مرکزونه او د دې ولایت د ۱۹ ولسوالیو مرکزونه هم په دې سیسټم سمبال شي.
د هرات عامې روغتیا ریاست د نظارت او تفتیش آمریت غړی خان محمد تیموري وايي: « د قلمي او نه لوستل کېدونکو نسخو په اړه ګڼ شکایتونه موجود وو او له همدې امله د هرات عامې روغتیا ریاست دا پرېکړه وکړه، ترڅو د خلکو ستونزې هوارې شي.»
بله خوا، روغتیاپالان هم دا اقدام ستايې او وايي، له دې سره به ناروغانو او د هغوی مل کسانو ته بېلا بېلې اسانتیاوې را منځته شي.
ډاکټر طوفان مهیمن وايي: « اوس دا کمپیوټري نسخې ډېرې ښې دي، ډاکټرانو، ناروغانو او درملتونونو ته ډېرې ګټې لري. په دې سره به ډاکټران، ناروغان او درمل پلورونکي ټول د ناسمو درملو د تجویز یا ورکړې له ستونزې څخه خلاص شي.»
همدارنګه د هرات اوسېدونکي وایي، د یوشمېر ډاکترانو له خوا په شفري ډول نسخو لیکلو د درملو پیدا کولو برخه کې ورته سرخوږی جوړ کړی وو، خو اوس تمه شته چې یادې ستونزې حل شي.
د هرات اوسېدونکی سید حامد وايي: « دا ډېر ښه کار وشو. اوس موږ کولی شو له هغه ځای یا درملتون څخه درمل واخلو چې زموږ خوښ وي.»
د هرات یو بل اوسېدونکی خان آقا حنان وايي: « دا کار باید په ټولو روغتونونو او کلینیکونو کې جبري شي. که داسې وشي، خلک به کولی شي چې درمل په هر درملتون کې ترلاسه کړي.»
د روغتیايي چارواکو د شمېرو له مخې، دا مهال هرات ښار کې ۱۲۰۰ درملتونونه او۴۰ لوی روغتونونه فعالیت لري.
