له نږدې پنځو کلونو وروسته بادغیس، فراه او هلمند ولایتونو کې د پولیو د درېیو مثبتو پېښو ثبت کېدو سره یو ځل بیا هرات کې د دې ویروس خپرېدو په اړه اندېښنې زیاتې شوې.
تازه د هرات روغتیایي مسوولان وایي، په پام کې ده د دوشنبې په ورځ د هرات ښار ۱۵ ناحیو او انجیل ولسوالۍ کې د ګوزڼ ضد واکسین فرعي کمپاین پیل شي. چاراکي وايي، په دې څلور ورځني کمپاین کې به شاوخوا ۳۰۴ زره له پنځو کالو کوچنیو ماشومانو ته د ګوزڼ ضد څاڅکي ورکړل شي.
د هرات عامې روغتیا مرستیال غلام محمد حنیفي وايي: « کوم کمپاین چې ټاکل شوې دوشنبه پیل شي او تر پنجشنبې ادامه ولري، په کې به د هرات ښار او انجیل ولسوالۍ کې ۳ سوه ۴ زره تنو تر پنځو کالو کوچنیو ماشومانو ته د پولیو واکسین ورکړل شي.»
په ورته وخت کې د هرات سیمه ییزې ادارې چارواکي وایي، د فلج کوونکي ویروس په اړه د دیني عالمانو، د ګذر وکیلانو او رسنیو له لارې د پوهاوي پروګرام پیل شوی. دوی زیاتوي چې اوس د امنیت ښه کېدو سره، د هرات په لرې پرتو سیمو کې هم د واکسین د تطبیق زمینه برابره شوې او باید د ماشومانو د واکسین روغتیایي ګټو په اړه عامه پوهاوی زیات شي.
د هرات د حج او اوقافو ریاست د جوماتونو آمر عبدالوهاب رحماني وايي: « تېره جمعه د حج او اوقافو ریاست له خوا ټولو علماوو او خطیبانو ته مکتوب واستول شو، ترڅو د پولیو واکسین موضوع د معابرو له لارې خلکو ته ورسول شي.»
بله خوا، د هرات اوسېدونکي هم ګاونډیو ولایتونو کې د پولیو درېیو مثبتو پېښو ثبت کېدو څخه په اندېښنې سره ټینګار کوي چې خلک او حکومت دې په ګډه د دې ویروس له منځه وړلو کې همکاري وکړي.
د هرات اوسېدونکی محمد ناصر وايي: « د پولیسو واکسین د ماشومانو لپاره ډېر اړین دی. کورنۍ باید همکاري وکړي او خپل ماشومان واکسینولو ته راولي.»
د هرات اوسېدونکی سلطان احمد وايي: « د بادغیس او فراه ولایتونو خلک هم باید په دې کمپاین کې ونډه واخلي، ترڅو ټول ماشومان له دې ناروغۍ وژغورل شي. باید د لرې پرتو ځایونو خلک هم همکاري وکړي، ترڅو دا پروسه بریالۍ شي.»
که څه هم په تېرو شاوخوا پنځو کالو کې په هرات کې د ګوزڼ ویروس هېڅ مثبته پېښه نه ده ثبت شوې، خو په بادغیس، فراه او هلمند ولایتونو کې د درېیو مثبتو پېښو له ثبت کېدو وروسته په هرات کې د دې ناروغۍ د خپرېدو اندېښنې را ولاړې شوې دي.
