هرات کې د ماشومانو درملنې لپاره د ۴۰۰ بستریز فوق تخصصي خیریه روغتون د جوړولو چارې ۳۰ سلنه بشپړې شوې دي.
مسوولان وایي، یاد روغتون به د ۵ میلیونه امریکايي ډالرو په لګښت پر ۲۰ زره متره مربع ځمکې له نړیوالو معیارونو سره سم جوړ شي او په کې به په وړیا ډول د ماشومانو درملنه کېږي.
د روغتون جوړولو پروژې انجنیر شعیب عطایي وايي: « دا روغتون په ۱۰ پوړونو کې جوړېږي چې مخنۍ ودانۍ به یې ۲ او شاتنۍ به ۸۰ پوړونه ولري. په دې روغتون کې هره ورځ شاوخوا ۱۰۰ تنه کارګران په دوو ټایمونو کې کار کوي. تر اوسه د دې پروژې ۳۰ سلنه کارونه پرمخ تللي دي.»
له بلې خوا، د هرات اوسېدونکي هم د یاد روغتون جوړولو هرکلی کوي او وایي، وروستیو کالو کې د هرات نفوس له زیاتېدو سره اړتیا ده چې په دې ولایت کې د حوزوي روغتون ترڅنګ، نور روغتونونه هم جوړ شي.
د هرات اوسېدونکی عبدالرازق وايي: « د کډوالو په راتګ سره د هرات نفوس زیات شوی او اړتیا ده چې د حوزوي روغتون ترڅنګ، نور روغتونونه هم جوړ شي. دا چې د ماشومانو لپاره ځانګړی روغتون جوړېږي، دا ډېر ښه ګام دی او کولی شي د لوېدیځ زون اړتیاوې پوره کړي.»
د هرات بل اوسېدونکی روح الله وايي: « نه یوازې هرات بلکې ټول افغانستان کې نفوس زیات شوی او له بلې خوا مهاجرین هم راځي، نو اړتیا ده چې نور معیاري روغتونونه هم جوړ شي؛ ترڅو ټولو هېوادوالو ته روغتیايي خدمات ورسېږي.»
په ورته مهال، د هرات ځایي مسوولان هم ډاډ ورکوي چې اسلامي امارت په هېواد کې د پراختیایي او ټول ګټو پروژو پلي کولو ته ژمن دی او هڅه کوي چې روغتیایي او نورو خدمتونو ته د خلګو لاسرسی لا اسانه کړي.
د هرات والي ویاند محمد یوسف سعیدي وايي: « د افغانستان اسلامي امارت او د هرات ولایت محلي اداره د زېربنايي او انکشافي پروژو جوړولو په برخه کې هڅې کوي. د هرات ولایت د ماشومانو ۴۰۰ بستریز روغتون جوړول یوه له هغو سترو پروژو څخه ده چې کارونه يې چټک روان دي.»
د یادونې وړ ده چې یاد روغتون په لس پوړونو کې د یوه سوداګر په شخصي لګښت جوړیږي او تر راتلونکو دوو کلونو به یې چارې بشپړې شي.
