د هرات حوزوي روغتون ډاکټران وايي، اوس مهال په دې روغتون کې د ماغزو او اعصابو جراحۍ لپاره لازم امکانات په واک کې لري او هره میاشت لسګونه منظم جراحي عملیات ترسره کوي.
د ډاکټرانو په خبره، دوی هره میاشت له ۴۵ تر ۵۰ پورې د ماغزو او اعصابو جراحي عملیات ترسره کوي او په کې له ماغزو د تومورونو ایستل، د ملا د ډېسک او همدارنګه د ټرافیکي پېښو له امله رامنځته شویو مغزي او عصبي ستونزو درملنه شامل دي.
د هرات حوزوي روغتون د مغز او عصابو جراحۍ څانګې مسوول برکت الله محمدي وايي: « د خدای شکر دی بېړنۍ پېښې او عاجل عملیات له تېرو څو کالو راهیسې همدلته ترسره کېږي، یوازې یو شمېر اېنډېسکوپیک پېښې بهر ته استول کېږي، ځکه چې موږ یې دا مهال امکانات نه لرو. همدارنګه د درملیزې شعاع برخه کې هم دلته امکانات نه لرو.»
د عصبي جراحۍ ډاکټر عبدالغغور هومان وايي: « د مغز او اعصابو د جراحۍ په برخه کې دلته مختلف کېسونه مراجعه کوي. ډېر ناروغان چې دلته مراجعه کوي، د ټرما یا د ټرافیکي پېښو ټپیان دي چې په تېرو دوو کالو کې یې کچه لوړه شوې ده. همدارنګه د مغزي تومور او ملا ډېسک لپاره هم ناروغان مراجعه کوي.»
د هرات د حوزوي روغتون چارواکي دغه راز وايي، دا مهال نه یوازې د لوېدیځ زون ولایتونو ناروغان بلکې د هلمند، کندهار او یو شمېر نورو ولایتونو اوسېدونکي هم د درملنې لپاره هرات حوزوي روغتون ته مراجعه کوي.
د دوی په خبره، د ماغزو او اعصابو اړوند شاوخوا ۹۰ سلنه ناروغیو درملنه او جراحي عملیات اوس په هرات حوزوي روغتون کې ترسره کېږي او یوازې ۱۰ سلنه ناروغان د درملنې لپاره بهرنیو هېوادونو ته استول کېږي.
ډاکټران وایي، که د درملیزې وړانګې( شعاع) او فکسېشن عملیاتو لپاره ورته امکانات برابر شي، پاتې ۱۰ سلنه ناروغان به هم په کور دننه تر درملنې لاندې ونیول شي.
د ماغزو او اعصابو جراحۍ متخصص عزیزالرحمن جامي وايي: « که څه هم موږ ته یو شمېر نوي وسایل راغلي، خو لاهم ځینو وسایلو ته اړتیا لرو. د مثال په توګه فلوروسکوپ نه لرو حال دا چې خورا شدیده اړتیا ورته لرو. دا وسیله د هغو کسانو د درملنې لپاره ډېره اړیکه ده چې د ملا فکسېشن ته اړتیا لري. دا عملیات هم په هرات کې کېږي، خو له حوزوي روغتون څخه بهر.»
په ورته مهال، د هرات اوسېدونکي بیا وایي، په دې وروستیو کې یې په هېواد دننه پر شته طبي امکاناتو او متخصصو ډاکترانو باور زیات شوی او خوښ دي چې اوس د بهرنیو هېوادونو په ځای په خپل هېواد کې درملنه کوي.
د هرات اوسېدونکی سید جاوېد وايي: « روغتون کې ناروغانو ته رسیدګي د تېر په پرتله ښه شوې؛ هم ډاکټران هڅه کوي او هم امکانات ډېر شوي.»
ناروغ سیدامیر وايي: « دلته خدمات د تېر په پرتله ډېر ښه شوي، زه له ډاکټرانو او مسوولینو مننه کوم.»
د خلکو په باور، په کور دننه د ماغزو او اعصابو جراحۍ عملیاتو کې پرمختګ نه یوازې د ناروغانو د درملنې بهیر اسانه کړی بلکې د لوړو لګښتونو او بهرنیو هېوادونو ته د سفر ستونزې یې هم راکمې کړې دي.
