د ننګرهار ولایت شینوارو ولسوالۍ اوسېدونکی ۳۳ کلن حشمت الله هغه څوک دی چې تازه یې ختیځ زون کې د افغاني سرې میاشتې ټولنې د رواني ناروغیو درملنې مرکز کې درملنه شوې.
نوموړی وايي، د تېرو جګړو پرمهال د کورنۍ غړیو له وژل کېدو وروسته په رواني ستونزو اخته شوی او په وروستيو کې يې ناروغي دومره سخته شوې وه چې خپل ذهني او عصبي توازن يې له لاسه ورکړ.
حشمت الله اوس له رواني ناروغۍ بېرته رغېدلی او وايي، د ژوند لپاره یې یو ځل بیا هیلې پیدا شوې دي.
حشمت الله په دې اړه وايي:« زما په اعصابو فشار او بوج راتله او دماغي ستونزې مې لرلې. زما اعصاب نا آرام و او زه یې په تکلیفولم. زه بیا دلته افغاني سرې میاشتې ته راغلم، اوس جوړ شوی یم. زه له خپلې درمنلې خوشاله یم او غواړم له کورنۍ سره یوځای شم.»
ډاکټران ټینګار کوي چې له رواني ناروغیو د ځان ساتنې غوره لاره سالمه بوختیا او سپورټ دی او په خبره يې، هغه کسان چې پر رواني ناروغیو اخته شوي باید په ټولنه کې ورسره د ښه چلن په کولو مثبته روحيه ورکړل شي.
د رواني ناروغیو معالج ډاکټر میرویس دانش وايي: « د رواني ناروغ لپاره یو ښه ډاکټر د کورنۍ غړی دی، د ټولنې یو ښه وګړی دی، همدارنګه یو ښه روغتون او شفاخانه د هغه لپاره کورنۍ ده او کور دی. د دوی لپاره ښه درمل نېک سلوک، چلن او رفتار دی، ترڅو د ده په سلوک او روان کې ښه والی راشي. دا ډول خلک د نورو له ښه چلن او سلوک متأثره کېږي او په روان کې یې د رامنځته شويو ستونزو مخنیوی کېږي.»
ختیځ زون کې د افغاني سرې میاشتې ټولنې مسوولین بیا وايي، د نورو کلونو پرتله ننګرهار کې د رواني ناروغانو شمېر زیات شوی.
د دوی په خبره، د کافي امکاناتو او مناسب ځای نه شتوالي له امله نه شي کولی په بشپړه توګه د ټولو ناروغانو درملنه وکړي.
خیتځ زون کې د افغاني سرې میاشتې ټولنې رئیس قمر ګل نصرت وايي: « موږ دغه ځای په کرایه نیولی او د بستر لپاره کافي ځای نه لرو. په پلان کې ده چې د دې ناروغانو لپاره ستندرد ځای جوړ کړو. په نوي ځای کې به دا ناروغان د هغوی د ناروغۍ کچې ته په کتو بستر او د درملنې امکانات به ورته برابرېږي.»
اوس مهال پر افغاني سرې میاشتې ټولنې سربېره د ننګرهار په حوزوي روغتون کې هم د رواني ناروغانو د درملنې لپاره ځانګړی واټ شته او په رواني ناروغیو اخته کسانو درملنه په کې ترسره کېږي.
