پامیر حیواني روغتون چې د هېواد په کچه د څارویو د درملنې په موخه تازه پرانستل شو، مسوولین وايي پر جوړولو يې ۵۰ میلیونه افغانۍ لګښت راغلی.
په دې روغتیایي مرکز کې به د کورنیو او بهرنیو متخصصینو په مرسته، د څارویو ناروغۍ تشخیص، درملنه او نور خدمات وړاندې کیږي.
د څارویو درملنې مرکز مشر سید حشمت الله سادات وايي: « موږ د دې روغتون لپاره پنځوس میلیونه لومړنۍ پانګه په پام کې نیولې. له موږ سره ۳۰ تنه کورنۍ او بهرني متخصص ډاکټران په کار بوخت دي. موږ په پام کې لرو چې د خپل روغتون څانګې د هېواد په اوو زونونو کې هم پرانیزو.»
د ننګرهار کرنې او مالدارۍ ریاست مسوولین د څارویو درملنې لپاره د دې مجهز روغتون پرانسته د مالدارۍ په سکټور کې مهم ګام بولي او زیاتوي چې حکومت د خصوصي سکټور ملاتړ او پیاوړتیا ته ژمن دی.
د ننګرهار کرنې، اوبو لګولو او مالدارۍ رییس مولوي عبدالستار سعید وايي: « دا په ځانګړې توګه د ننګرهار ولایت او په عمومي توګه د ختیځ زون لپاره لوی زېری دی. موږ پر نورو پانګوالو هم غږ کوو چې راشي او د هېواد په داخل کې پانګونه وکړي. موږ د کرنې، اوبو لګولو او مالدارۍ په برخه کې پانګونې ته اړتیا لرو او په دې برخه کې له پانګونې ملاتړ کوو.»
بله خوا، د دې روغتون متخصصین وایي چې په دې مرکز کې به د څارویو لوی او کوچني عملیاتونه هم د پرمختللیو وسایلو پر مټ ترسره کېږي.
د څارویو د درملنې مرکز متخصص ډاکټر سعید احمد وايي: « موږ په دې روغتون کې هم د څارویو او هم د چرګانو لپاره خدمات لرو. موږ د مالدارۍ په برخه کې د داخلې، جراحۍ او مصنوعي القاع خدمات لرو. دلته د شپې لپاره د څارویو پاتې کېدو انتظام هم شوی او که اړتیا شي، ساحې ته هم خپل ټیمونه استولی شو.»
هغه مالداران چې تر دې وړاندې د څارویو درملنې برخه کې له ګڼو ستونزو سره مخ وو، د دې روغتون په جوړېدو خوښ دي او د خپلې مالدارۍ د ودې لپاره یې مهم اقدام بولي.
په مالدارۍ بوخت مسعود وايي: « موږ د دې روغتون جوړېدو ته ډېر خوښ یو، ځکه چې کله به زموږ څاروي ناروغ شول، د ډاکټرانو نه شتون له امله به تلف شول. موږ غواړو دا ډول روغتونونه نور هم ډېر شي.»
مالدار شهزادګل وايي: « اوس چې جلال اباد ښار کې د څارويو درملنې روغتون جوړ شوی، زموږ د بزګرانو او مالدارو ستونزې به ورسره هوارې شي.»
دا چې د ډېرو افغان وګړو تکیه پر کرنې او مالدارۍ ده، په همدې دوو برخو کې مسلکي ظرفیتونو او بنسټونو ډېروالی به د دې سکټور له ودې او په یاده برخه کې د پانګونې له جذب سره مرسته وکړي.
کروندګر او مالداران پر یاد مرکز سربېره په همدې برخه کې د کیفیت لرونکو ماشینونو او درملو پر راوړلو ټینګار
