د کندهار میرویس حوزوي روغتون ته هره ورځ سلګونه ناروغان د پښتورګو درملنې لپاره مراجعه کوي.
روغتیایي مسوولین وايي، یوازې په تېرو دریو میاشتو کې له کندهار ښار او جنوبي ولایتونو له ۳۵۰۰ زیات ناروغانو دیالیز خدمات ترلاسه کړي دي.
د دوی په خبره، اړتیا ته په کتو هڅه کوي دا خدمات نور هم زیات کړي.
میرویس حوزوي روغتون کې د پښتورګو ډاکټر محمد ناصر فېروز وايي: « که په عمومي توګه ووایم، دلته له ۵ تر ۷ زرو ناروغان راځي، خو په ځانګړې توګه هغه ناروغان چې د هیموډیالیز پروسه ورته اجراء کېږي، نو د دوی شمېر له ۳ زره ۵۰۰ تر ۳ زره ۶۰۰ نارغان راځي او دا خدمات ورته اجراء کېږي. اوس د پخوا په پرتله په دغو خدماتو کې زیاتوالی راغلی.»
ډاکټران باور لري چې د لوړ فشار او پښتورګي ناروغیو ته نه پاملرنه ښايي د ناروغ روغتیایي وضعیت ډېر خراب کړي.
دوی ټینګار کوي چې روغتون ته په وخت مراجعه او له دیالیز خدمتونو ګټه اخیستل کولی شي له جدي ستونزو مخنیوی وکړي او د ناروغانو ژوند وژغوري.
د پښتورګو ناروغیو متخصص رُومل یوسفزی وايي: « موږ هره ورځ داسې ناروغان لرو چې د وینې فشار یې لوړ دی او معلومات نه لري، یعنې دوی د ځان معاینه نه کوي. دوی باید په کال کې دوه ځله معاینه وکړي. کله چې دلته د سر دردۍ له امله ناروغان راځي او موږ یې د وینې فشار چک کوو، لیدل کېږي چې د لوړ فشار له امله یې پښتورګي خراب شوي. زه هېوادوالو ته سپارښتنه کوم چې له انرژي څښاکو، ترشي او اچارو له خوړولو ډډه وکړي او په کافي اندازه مایعات واخلي.»
تر دې وړاندې د امکاناتو کمښت او د ناروغانو شمېر زیاتوالي د درملنې بهیر ټکنی کړی و، خو اوس د نویو ماشینونو په برابرېدو او د بسترونو په زیاتېدو سره د ناروغانو درملنه چټکه او اسانه شوې ده.
یوشمېر ناروغان چې د دیالیز خدمات یې ترلاسه کړي وایي، د خصوصي روغتونونو د لوړ لګښت توان نه لري او له همدې خدماتو خوښ دي.
دوی غوښتنه کوي چې دا خدمات باید دوام ومومي او لا پراخ شي.
د پښتورګو ناروغ شفېعالله وايي: « زه ډېر سخت په تکلیف وم، خو دا معلومات راته نه کېده چې زه د پښتورګو په ناروغۍ اخته یم. کله چې روغتون ته راغلم او معاینات مې وکړل، راته ویې ویل چې زما د پښتورګو ناروغي ده او تر ۷۰ فیصده له کاره غورځېدلي دي. اوس شکر دی ډېر ښه شوی یم.»
د یوه بستر ناروغ خپلوان محمد حنیف وايي: « موږ د شخصي روغتونونو د لوړو لګښتونو وس نه لرو؛ اوس دلته راغلی یم ناروغ مې راوستی. شکر دی دلته مې د ناروغ ښه پالنه کېږي.»
دا په داسې حال کې ده چې په تېرو څو میاشتو کې د کندهار اوسېدونکي د دې روغتون په بېلابېلو برخو کې له ګڼو ستونزو سره مخ شوي، خو مسوولین د ستونزو د حل ډاډ ورکوي.
