د ملګرو ملتونو د بشري مرستو همغږۍ دفتر(اوچا) وایي، افغانستان کې میلیونونه میندې او ماشومان د خوارځواکۍ له ګواښ سره مخ دي.
د اوچا دفتر زیاته کړې، په ۲۰۲۶کال کې به شاوخوا ۴.۹ میلیونه میندې او ماشومان خوراکي مرستو ته اړتیا ولري.
یادې ادرې په افغانستان د ستونزو حل په موخه د چټک اقدام او لازم ملاتړ غوښتنه کړې، ترڅو د ډېرو انسانانو ژوند وژغورل شي.
اوچا دغه راز ویلي: « افغانستان کې د میلیونونه میندو دا هڅه د ستاینې وړ ده چې د خوارځواکۍ له ګواښ سربېره هم د خپلو ماشومانو د ساتنې لپاره د هیلې او مقاومت هڅه کوي. د روان کال په جریان کې۴.۹ میلیونه افغان میندې او ماشومان د تغذیې ملاتړ ته جدي اړتیا لري.»
د ملګرو ملتونو یاد دفتر ټینګار کړی چې د خوارځواکۍ د مخنیوي لپاره دوامداره بشري مرستې او پر وخت اقدام ډېر مهم دی.
تېره ورځ روسیې په افغانستان کې بشري وضعیت خورا ډېر کړکېچن یاد کړ او دا څه یې د لوېدیځو هېوادونو د ناکامو سیاستونو پایله بللې وه.
د روسیې بهرنیو چارو وزارت لوېديځ هېوادونه د افغانستان د بشري وضعيت د خرابېدو مسؤل بللي او وايي، له افغانستان سره د نړيوالو مرستو سياسي کول د دې کړکېچ له اصلي لاملونو څخه دي.
دا په داسې حال کې ده چې د ملګرو ملتونو د بشري مرستو همغږۍ دفتر(اوچا) تر دې وړاندې هم خبرداری ورکړی و چې په ۲۰۲۶کال کې به په افغانستان کې شاوخوا ۳.۷ میلیونه ماشومان په خوارځواکۍ اخته شي او که د ژوند ژغورونکو او مخنیوي وړ تغذیوي پروګرامونو پراختیا ته بېړنۍ پاملرنه ونه شي؛ نو دا وضعیت به لا کړکېچن شي.
