ملګرو ملتونو د هغې تازه سروې پايلې خپرې کړې چې په افغانستان کې يې پر خوارځواکۍ د اخته ماشومانو او مېندوارو مېرمنو تشخيصولو په اړه ترسره کړې.
دا سروې د ملګرو ملتونو اړوند ادارو له لوري ترسره شوې او په پايله کې يې افغانستان د هغو ۱۵ هېوادونو په ډله کې ياد شوی چې ماشومان په کې له شدیدې خوارځواکۍ سره مخ دي.
د سروې د موندنو له مخې، شاوخوا ۵.۳ ميليونه افغان ماشومان له شدیدې خوارځواکۍ او ۴.۱ میلیونه هغه د ژوند له ګواښوونکي حالت سره مخ بلل شوي.
ملګري ملتونه زیاته کړې:« افغانستان د هغو ۱۵ هېوادونو له ډلې دی چې د ماشومانو شدیدې خوارځواکۍ کچه په کې لوړه ده. اوس مهال په دغه هېواد کې له پنځه کلنۍ کم عمره څه باندې ۵.۳ میلیونه ماشومان شدیده خوارځواکي لري، چې له ډلې یې ۱.۴ میلیونه ماشومان د ژوند له ګواښوونکي حالت سره مخ دي. پر دې سربېره، په هرو ۱۰ ښځو کې ۴ ښځې خوارځواکې دي، چې تر ډېره پورې دغه حالت ته په غبرګون کې دوی ته پاملرنه نه کېږي.»
په دې اړه د ملګرو ملتونو اړوند ادارو چې ياده سروې يې ترسره کړې په يوه ګډه خبرپاڼه کې د افغانستان لپاره د روغتیا نړیوال سازمان د مسوولینو له قوله د خوارځواکو ماشومانو د شمېر زیاتوالی د مېندوارۍ پر مهال د ښځو نه ملاتړ بولي او ټینګار کوي، چې نړیواله بسپنه ورکوونکي باید په دغه برخه کې خپلې مرستې زیاتې کړي.
د افغانستان لپاره د روغتیا نړیوال سازمان استازی ایډوین سالواډور وايي:« کله چې مېندې د خوارځواکۍ له امله زیانمنې وي؛ نو په ډېر احتمال سره د هغې ماشومان هم کم وزنه زیږېږي او په ماشومتوب، تنکۍ ځوانۍ او لویوالي کې د ودې په برخه کې له ستونزو او ناوړه پرمختیایي پایلو سره مخ کېږي. د دې کړۍ د ماتولو لپاره د ژوند په هر پړاو کې پر مخنیوي او درملنې متمرکزو فعالو تګلارو ته اړتیا ده.»
په همدې حال کې ډاکټران هم خوارځواکي په اوسني وضعیت کې یوه جدي ستونزه بولي او په خبره یې، که دا لړۍ همداسې ادامه پیدا کړي؛ نو نه یوازې د ماشومانو ژوند اخلي؛ بلکې په اوږدمهال کې به ښځې هم له بېلابېلو ناروغیو سره مخ شي.
ډاکتر عبدالحق قاضيزاده وايي:« که چېرته په افغانستان کې دغه مشکل ته پاملرنه ونه شي او دې مشکل ته حللاره ونه موندل شي، نو دغه بحران به ورځ تر بلې لوړېږي او بالاخره په اوږدمهال کې به یې پایله ډېره ناوړه وي. لومړی دا چې ماشومان به خپل ژوند له لاسه ورکوي او دویم مېندې به پر کم خونۍ اخته کېږي او د کمخونۍ په پایله کې به قلبي، د ګردو او نورې اړونده روغتیایي ستونزې رامنځته کېږي.»
هڅه مو وکړه چې د خوارځواکۍ په تړاو د ملګرو ملتونو له لوري د وروستي راپور په اړه د عامې روغتیا وزارت مسوولینو نظر له ځان سره ولرو خو زموږ اړيکې يې ځواب نه کړې.
د ۲۰۲۵ کال د مې میاشتې پر ۲۳مه، د روغتیا نړیوال سازمان له لوري د رابلل شوې نړيوالې اسمبلې د ۷۸مې غونډې اجراییه بورډ نړیوالو تغذیوي موخو ته د رسېدو موده تر ۲۰۳۰ کال پورې وغځوله چې موخه یې د خوارځواکۍ د ټولو ډولونو له منځه وړلو او د تلپاتې پرمختګ پر لور د چټک مخکې تګ لپاره د نړیوالې ژمنتیا بیا تاییدول بلل شوې دي.
