کندهار کې د ملګرو ملتونو د خوړو او کرني نړیوال سازمان له لوري د څارویو طاعون ناروغۍ د مخنیوي په موخه د واکسینولو کمپاین پیل شو. چارواکي وايي، په دې کمپاین کې به د کندهار ښار په شمول د دې ولایت په ۱۰ ولسوالیو کې کوچنیو څارویو ته واکسین ورکړل شي.
د کندهار کرني، اوبو لګولو او مالدارۍ ریاست مسوولین وایي، په دې ولایت کې یوازې تېرکال ۳۰ سلنه څاروي د طاعون ناروغۍ له امله تلف شوي، خو دا مهال د پاتې څارویو د ژغورني ترڅنګ، د یادې ناروغۍ د مخنیوي په موخه هم پراخې هڅې پیل شوې دي.
د کندهار کرنې ریاست ویاند محمد حنیف حقمل وايي: « په کندهار کې یو ځل بیا د طاعون ناروغۍ یا پيپيآر واکسین لرو چې د کندهار کرنې ریاست په هڅو او د اېپياو موسسې په مالي ملاتړ تطبیق کېږي. دا واکسین د کندهار په ۱۰ ولسوالیو او ښار کې تقریبا ً ۸۰ زره څارویو ته ورکول کېږي. طاعون یوه خطرناکه او وژونکې ناروغي او تېر کال یې په کندهار کې زموږ د اټکل له مخې شاوخوا ۳۰ سلنه څاروي وژلي. دا واکسین په همدې موخه پلی کېږي، ترڅو د څارویو د تلفاتو مخنیوی وشي.»
په کندهار کې د څارویو د روغتیا عمومي مدیر ډاکټر توریالی قیام وايي: « دا ډېره د خوښۍ خبره ده چې زموږ مالدارانو ته دا چانس برابر شو چې د دوی څاروي واکسین کېږي. له نېکه مرغه دغه واکسین د پنځو کالو لپاره معافیت لري.»
له بلې خوا، مالداران وایي تر دې وړاندې يې د واکسين د نه شتوالي له امله یو شمېر څاروي مړه شوي، خو تمه لري چې د واکسينونو په مرسته د څارويو د تلف کېدو کچه را ټيټه شي.
د کندهار اوسېدونکی او مالدار نورشاه وايي:« موږ ډېر خوښ یو چې څاروي مو واکسین کېږي، ځکه طاعون ډېره خطرناکه ناروغي ده. تېر کال دغې ناروغۍ زموږ ډېر څاروي ووژل.»
د کندهار اوسېدونکی عادل احمد وايي: « طاعون ډېره خطرناکه ناروغي ده او تېر کال یې زموږ اکثریت څاروي ووژل. سږ کال موږ ډېر خوشاله یو چې واکسین را ورسېد او زموږ حیوانان به له طاعون څخه وژغورل شي.»
له کندهار وړاندې هلمند ولایت کې هم ٨٠ زره څارویو ته د طاعون د واکسین ورکولو لړۍ پیل شوې ده. د دې ولایت د مسوولینو په خبره، د مرکز لښکرګاه ترڅنګ به د ولایت په ١٢ ولسوالیو کې هم د ې واکسین لړۍ پلې شي.
دا په داسې حال کې ده چې وروستۍ وچکالۍ او حیواني ناروغیو په هېواد کې مالدارانو ته ډېر تاوان اړولی. دوی له حکومت او مرستندویه ټولنو غواړي چې په دې برخه کې ورسره مرستې وکړي.
