د عامی روغتیا وزیر مولوي نور جلال جلالي د یوه جګپوړي پلاوي په مشرۍ د هندوستان پلازمېنې نوي دهلي ته رسېدلی.
د عامی روغتیا وزارت د رسنیو مسوولین وايي، مولوي نور جلال جلالي د هند په رسمي بلنه نوي دهلي ته رسېدلی او ټاکل شوې د دې هېواد له روغتیایي چارواکو سربېره د نورو بېلابېلو ادارو له مشرانو سره هم ليدنې ولري.
د عامې روغتیا وزارت ویاند ډاکټر شرافت زمان د دې سفر اساسي موخه له هند سره د روغتیا، افغانستان ته د درملو د واردولو او د درملنې په برخه کې د دواړو هېوادونو ترمنځ د همکاریو پیاوړې کول بولي.
ډاکټر شرافت زمان زیاتوي: «د افغانستان اسلامي امارت د عامې روغتیا وزیر، ښاغلی مولوي نورجلال جلالي د هند هېواد په رسمي بلنه د یوه پلاوي په مشرۍ دې هیواد ته په رسمي سفر لاړ. دا سفر چې د دواړو هېوادونو د روغتیايي همکاریو د پیاوړتیا، د تجربو تبادلې او ګډو هڅو د تنظیم په موخه ترسره کېږي، څو ورځې به ادامه ولري. د سفر پر مهال به ښاغلی وزیر د هند له بېلا بېلو مسوولینو او په ځانګړې توګه د روغتیا له چارواکو سره جلا کتنې ولري او په ځینې تنظیم شویو پروګرامونو کې به ګډون وکړي.»
د روغتیا وزارت د ویاند په خبره، د عامې روغتیا وزیر به د افغان روغتیایي کارکوونکو لپاره د ظرفیت لوړونې زمینې برابرولو، افغانستان ته د طبي تجهیزاتو او معیاري درملو واردولو او هغو ناروغانو لپاره هند ته د تګ زمینې برابرولو په اړه له هندي چارواکو سره خبرې ولري چې دلته افغانستان کې یې درملنه نه شي کېدای.
