د فبروري څلورمه د سرطان نړیوالې ورځې سره سمون لري. په همدې مناسبت د غونډو جوړولو اساسي هدف د دې وژونکې ناروغۍ په اړه عامه د پوهاوي زیاتول دی؛ هغه چې په نړۍ کې د انسانانو د مړیني یو له سترو لاملونو ګڼل کېږي.
د عامی روغتیا وزارت چارواکو هم د همدې ورځې په مناسبت جوړه شوې غونډه کې سرطاني ناروغۍ ټولنیزه، اقتصادي او انساني ننګونه بولي او وايي، د دې ناروغۍ مخنیوی د نړیوالو سازمانونو او ټولنې ګډ مسوولیت دی.
د عامي روغتیا وزارت د روغتیایي خدمتونو مرستیال وايي، هڅې روانې دي چې هېواد کې دننه د سرطاني ناروغیو د تشخیص او درملنې په برخه کې تخصصي خدمات پراخ او معیاري شي.
د عامي روغتیا وزارت د روغتیایي خدمتونو وړاندې کولو مرستیال عبدالولي حقاني وايي: « موږ هڅه کوو چې د سرطان اړوند تخصصي روغتیايي خدماتو ته پراختیا ورکړو، د تشخیص او درملنې لپاره ښه معیاري سیسټم رامنځته کړو، د روغتیايي پرسونل ظرفیت او د عامه پوهاوي پروګرامونه په منظم او دوامدار ډول پلي کړو.»
عامي روغتیا وزارت چارواکي دغه راز وایي، په هېواد کې د سرطاني ناروغیو ريښه ژوره ده او د تېرو څو لسیزو جګړو پر مهال د بېلابېلو وسلو کارولو سره دا ناروغي ډېره شوې. نوموړي په دې اړه ارقام او شمېرې وړاندې نه کړل.
د روغتیا نړیوال سازمان استازي هم په افغانستان کې د سرطان ناروغۍ د زیاتېدو لاملونو ته اشاره وکړه او ویې ویل، د تېرو څو لسیزو جګړو یوازې ودانۍ نه دي ویجاړې کړې بلکې د سرطان په څېر وژونکې ناروغۍ یې هم زیاتې کړې دي.
د روغتیا نړیوال سازمان دغه چارواکی هم په افغانستان کې د سرطاني ناروغیو په درملنه او مخنیوي کې د نړیوالو مرستې مهمې بولي او وايي، دوی له افغانستانه څه باندې۶۰ډاکټران، نرسان او درمل جوړوونکي د انکولوژۍ، کیموټراپۍ د تطبیق او د تسکیني پاملرنې په برخه کې روزلي دي.
افغانستان کې د روغتیا نړیوال سازمان استازی مېنول دلارا وايي: « موږ ژمن یو چې د پوهاوي لوړولو، پر وخت تشخیص او له سرطان څخه د پاک راتلونکي لپاره هیلې رامنځته کړو. دا موخه د مخنیوي سکریننګ، کیموتراپۍ، درملو ته د لاسرسي، جراحي انکولوژۍ او تسکیني پاملرنې په برخو کې د روغتیایي کارکوونکو د ظرفیت لوړولو له لارې ترلاسه کوو.»
د روغتیا نړیوال سازمان په هرو پنځو کلونو کې د سرطان ناروغۍ په اړه څېړنه کوي او د دې سازمان د پنځو کلونو وړاندې(۲۰۲۰ کال) شمېرې ښیي چې هر کال ۲۳ زره افغانان د خولې او مرۍ په سرطان اخته کېږي.
بله خوا، ډېری خلک تېره اوونۍ په کابل کې د سرطان ناروغۍ د درملنې معیاري تخصصي روغتون پرانستلو ته خوښ دي او وايي، له دې سره به له هېواده بهر د دې ناروغې د درملنې لپاره د افغانانو اتکا کمه شي.
په ورته مهال، ډاکټران بیا د سرطان ناروغۍ د مخنیوي لپاره د خلکو د پوهاوي کچې لوړول مهم بولي او په دې برخه کې د عامه پوهاوي د اساسي پروګرامونو پلي کولو غوښتنه کوي.
