د عامې روغتیا وزارت د هېواد روغتیايي سکټور د پراختیا او اصلاح لپاره د خپلې نوې پنځه کلنې سټراټیژۍ د جوړېدو خبر ورکوي.
د دې وزارت مشرتابه نورجلال جلالي وايي، دا سټراتيژي د لومړۍ، دویمې او دریمې کټه ګورۍ روغتیايي خدمتونو پراختیا، د روغتیايي مرکزونو اصلاح، د ظرفیت لوړونه، برېښنايي روغتیايي سیسټم او د خصوصي روغتیايي سکټور پیاوړتیا په لمن کې را نیسي.
نورجلال جلالي وايي: « د عامې روغتیا وزارت نوې سټراټيژي د روغتیا بېلابېل ابعاد لکه د ابتدايي، ثانوي او ثالثي روغتیايي خدماتو ریفورم او اصلاحات، د خصوصي روغتیايي سکټور تقویه، ظرفیت لوړونه، د برېښنايي روغتیايي سیسټم پیاوړتیا او له بېلابېلو همکارو وزارتونو سره همکاري په نظر کې نیولې ده.»
د عامې روغتیا وزیر په خبره، د دې سټراټیژۍ په عملي کېدو سره به د هېواد په روغتیايي شاخصونو کې مثبت بدلون راشي او خلکو ته به د نړیوالو معیارونو سره سم روغتیايي خدمتونه وړاندې شي.
نوموړی زیاتوي، په نوې تګلاره کې د روغتیايي نظام د ځانبسیاینې لپاره ځانګړی تمرکز موجود دی، ترڅو افغانستان د نورو له اړتیا خلاص او ځان بسیاینې ته ورسېږي.
جلالي په دې اړه وايي: « زموږ د سټراټيژۍ بله مهمه برخه خودکفا او پایداره روغتیايي سیسټم جوړېدل دي، ترڅو وکولی شو له انجیومحورۍ څخه لاس په سر او ځان ترې خلاص کړو. له تېرو دوو لسیزو راهیسې زموږ روغتیايي سیسټم په ډېر قوي شکل پر بهرنیو مرستو متکي پاتې شوی.»
دغه راز، د عامې روغتیا وزارت مسوولین وايي، د روغتیايي خدمتونو د پراختیا په موخه په ولسوالیو کې د روغتونونو د ظرفیت لوړولو چارې هم روانې دي.
د ریاستالوزرا اداري مرستیال عبدالسلام حنفي بیا وايي، د عامې روغتیا وزارت د پنځه کلنې سټراټیژۍ تدوین د هېواد د روغتیايي نظام د پراختیا لپاره یو مهم ګام دی او هیله یې څرګنده کړه چې دغه پروګرام به په اغېزناکه توګه عملي شي.
نوموړي د دې سټراټیژۍ د تشرېح په مراسمو کې وویل، د تېرو جګړو له امله د افغانستان روغتیايي سکټور له سختو زیانونو سره مخ شوی، ګڼ روغتونونه زیانمن شوي او یو شمېر روغتیايي کارکوونکي هم وژل شوي دي.
عبدالسلام حنفي زیاتوي: « د تحمیلي جګړو له امله زموږ روغتیايي سکټور ته هم ډېر درانه زیانونه اوښتي. په مختلفو سیمو کې زموږ اکثریت روغتونونه بمبار شوي او پرسونل یې شهیدان شوي دي.»
حنفي دغه راز وايي، لا هم په یو شمېر ولسوالیو او لرې پرتو سیمو کې خلک د روغتیايي خدمتونو له کمښت سره مخ دي او د درملنې لپاره اړ کېږي چې اوږده واټنونه ووهي.
نوموړي ټینګار وکړ چې د روغتیايي ستونزو د حل لپاره پراخو او بنسټیزو اقداماتو ته اړتیا ده او د اوږدمهالې سټراټیژۍ جوړول کولی شي د روغتیايي نظام د پرمختګ لپاره روښانه لار برابره کړي.
د ریاست الوزرا اداري مرستیال په دې اړه وايي: « موږ باید وکولی شو خپل اهداف په ګوته کړو، یانې دا چې موږ په راتلونکو پنځو کالو کې کوم کارونه باید ترسره کړو. د ظرفیت لوړول، تأسیس، ثانوي او ثالثي روغتونونه، د روغتونونو تجهیز او د داسې کدرونو چمتو کول چې په دغو مرکزونو کې په سمه بڼه د ناروغانو درملنه وکړای شي.»
مسوولینو د روغتیايي کادرونو روزنه او ظرفیت لوړونه هم د نوې سټراټیژۍ له مهمو برخو وبلل او له افغان متخصصینو یې وغوښتل چې له بهرنیو هېوادونو بېرته راستانه شي او د هېواد د روغتیايي سکټور په پیاوړتیا کې ونډه واخلي.
