د عامې روغتیا وزارت سرپرست د خوراکي توکو، درملو او روغتیايي محصولاتو د قاچاق مخنیوي قانون د معرفي کېدو په غونډه کې وویل، پر لوړه کچه درمل او طبي محصولات په قاچاقي توګه هېواد ته را واردېږي.
د دې زوارت سرپرست مولوي نور جلال جلالي وايي، دغې چارې له یوه لوري د بهرنیو کمپنیو د درملیزو اقلامو د ثبت پروسه ټکنۍ کړې او له بل لوري یې دعامې روغتیا وزارت اصلاحي پرګامونه له خنډ سره مخ کړي دي.
جلالي په دې اړه وايي: « د وارداتو په برخه کې درمل او روغتیايي محصولات په ډېره پیمانه د قاچاق له لارې د هېواد مارکېټونو ته راځي او بیا کارول کېږي. د دغو توکو کیفیت، خوندیتوب او مؤثریت د ډاډ وړ نه دی. دغې چارې د عامې روغتیا وزارت د اصلاحي پروګرامونو د پلي کېدو لړۍ له خنډ او ځنډ سره مخ کړې. د خوراکي توکو، درملو او روغتیايي محصولاتو قاچاق د دې لامل شوی چې د بهرنیو کمپنیو او د دوی د تولیدي درملیزو اقلامو د ثبت پروسه ټکنۍ شي او په پایله کې هېوادوالو ته د باکیفیته، خوندي او اغېزناکو درملو وړاندې کولو چاره له ستونزې سره مخ شي.»
جلالي زیاتوي، د خوراکي توکو، درملو او طبي محصولاتو د قاچاق مخنیوي قانون جوړ شوی چې د اسلامي امارت د رهبر له لوري په یوه مقدمه، څلور بابونو، درېیو فصلونو او ۳۴ مادو کې توشېح شوی دی.
دد جلالي په خبره، د دې قانون په پلي کېدو سره به د بې کیفیته خوراکي توکو، درملو او روغتیايي محصولاتو د قاچاق مخه ونیول شي.
د عامې روغتیا وزارت سرپرست نور جلال جلالي په دې اړه وايي: « د خوراکي توکو، درملو او روغتیايي محصولاتو د قاچاق د مخنیوي په اړه قانون جوړ شو او د شیخ امیرالمؤمنین له خوا توشېح شو. د دې قانون په پلي کېدو سره به د بې کیفیته غذا او درملو مخنیوی وشي.»
په همدې حال کې د عامې روغتیا وزارت د خوړو او درملو معین حمد الله زاهد وايي، د اسلامي امارت رهبر له توپیر پرته پر ټولو د قانون یوشان پلې کېدو لارښوونه کړې او ټینګار یې کړی چې ملګرتیا، خپلوي او نور پړاوونه باید د قانون د پلي کېدو پر وړاندې خنډ ونه ګرځي.
د عامې روغتیا وزارت د خوړو او درملو معین حمد الله زاهد وايي: « امیرالمؤمنین مسلسل په دې اسرار کاوه چې ګورئ وزیرانو، ګورئ معینانو، ګورئ د امارت مشرانو تاسو باید د قانون په پلي کولو کې پاتې را نه شئ. نه به د قوم، نه د انډيوال، نه د خپل، نه د پردي، نه د امیر او نه هم د فقیر سړي په دې کې لحاظ کوئ. د شریعت محمدي قانون کامیابي دا ده چې باید یو شان پر ټولو تطبیق شي.»
د خوراکي توکو، درملو او روغتیايي محصولاتو د قاچاق مخنیوي قانون د ښه پلي کېدو په موخه ځانګړی پلاوی هم ټاکل شوی چې مشري یې دعامې روغتیا وزارت سرپرست کوي.
په همدې حال کې عامې روغتیا وزارت د لایف پرل په نوم د درملو تولید یوې کارخونې ته (جي.اېم.پي) یا د درملو د غوره تولید په نوم تصدیق پاڼه هم ورکړه.
د درملو هغه تولیدي شرکتونه یا کارخونې چې یاده تصدیق پاڼه ولري، تولید شوي درمل یې په ټوله نړۍ کې د منلو او باور وړ دي.
