عامې روغتيا وزارت د دوشنبې په ورځ په ۱۹ ولايتونو کې د ګوزڼ ضد واکسينو درېيم فرعي کمپاين پيل کړ.
د دې وزارت مسوولین وايي، ياد کمپاين به په کابل، ميدان وردګ، باميان، دایکندي، ننګرها، لغمان، کونړ، نورستان، پکتيا، خورست، پکتيکا، غزني، کندهار، زابل، ارزوګان، هلمند، هرات، کندوز او بلخ ولایتونو کې د څلورو ورځو لپاره دوام وکړي او په پایله کې به یې ۷.۳ میلیونه له پنځو کالو کوچنيو ماشومانو ته د ګوزڼ ضد واکسين څاڅکي ورکړل شي.
د عامې روغتيا وزارت وياند شرافت زمان وايي: « نن د دوشنبې ورځ د هېواد په ۱۹ ولایتونو کې چې ۱۸۷ ولسوالۍ په بر کې نیسي، د پولیو واکسین درېیم فرعي کمپاین پیل شو. یاد کمپاین چې د څلورو ورځو لپاره به ادامه ولري، د ۷.۳ میلیونو په شاوخوا کې له پنځو کالو کوچنيو ماشومانو ته به د پولیو واکسین تطبیق شي. له قومي مخورو، علمای کرامو او د سیمې له با نفوذه اشاخصو مو هیله ده چې په سیمه کې زموږ له واکسیناتورانو سره مرستندویه اوسي. د عامې روغتیا وزارت هڅه کوي چې د ټولو واقایوي تدابیرو په عملي کولو، له ساري ناروغیو سره مبارزه وکړي. په همدې اساس، د پولیو واکسین په تطبیق سره موږ غواړو چې افغانستان کې د پولیو له ناروغۍ څخه مخنیوی وکړو.»
عامې روغتيا وزارت له قومي مشرانو او با نفوذه کسانو غواړي چې د ګوزڼ ضد پيل شوي کمپاين د تطبيق لپاره له واکسيناتورانو او روغتيايي کارکوونکو سره همکاري وکړي.
عام خلک بيا د واکسين د تطبيق ترڅنګ د ګوزڼ په اړه د عامه پوهاوي پروګرامونو د پلي کېدو او دغه راز له روغتيايي کارکوونکو سره په دې برخه کې د همکاريو غوښتنه کوي.
د ننګرهار اوسېدونکی امیرالله وايي: « له حکومت غواړم او خواهش لرم چې راشي او د عامه پوهاوي لپاره خپل کسان مؤظف کړي او هغه خلک پوه کړي چې د پولیو په مقصد او مانا نه پوهېږي. ځکه د پولیو واکسین زموږ ماشومان له فلج ژغوري.»
د ننګرهار اوسېدونکی زر جان وايي: « باید خلک له دې کمپاین سره مرسته وکړي او خپل ماشومان په وخت او زمان سره ور ورسوي.»
ډاکټران بيا په دې باور دي چې تازه پيل شوی کمپاين د ګوزڼ په اړه د عامه پوهاوي لپاره کافي نه دی او د لا زياتو او پراخو کمپاينونو د تطبيق غوښتنه کوي.
د دوی په خبره، ګوزڼ ساري ناروغي ده او د مخنيوي لپاره يې باید تدابېر په ګوته شي.
ډاکټر عبدالرازق احمدزی وايي:« پولیو یوه ساري او وژونکې ناروغي ده چې له یوه شخص بل شخص ته په اسانۍ سره انتقالېږي. د دې ناروغۍ د مخنیوي لپاره موږ کولی شو چې د واکسینونو په وسیله ځانونه خوندي کړو. د دې ناروغۍ نښې عبارت له تبې، سردرد، کانکې، نس ناستي او په ځینو برخو کې د بدن د یوه غړي فلج او فعالیت نه کېدل یې نښې دي. دا ناروغي کولی شي له یوه شخص بل شخص ته د بدن د افرازاتو او غایطه موادو له لارې انتقال شي.»
د ملګرو ملتونو د موندنو له مخې، دا مهال افغانستان او پاکستان هغه هېوادونه دي چې ګوزڼ په کې په بشپړه توګه نه دی محوه شوی.
که څه هم سرپرست حکومت د ګوزڼ د مخنيوي هڅې کوي، خو د پن په نوم يوه نړيوال روغتيايي سازمان موندلې چې د روان ۲۰۲۵ زېږدیز کال په جريان کې په افغانستان کې ۴ او پاکستان کې هم ۴ مثبتې پېښې ثبت شوې دي.
