په دولتې ادارو کې د کارکونکو د امتيازاتو کمولو په تړاو له راپورته شويو څرګندونو او اندېښنو سره سم، د عامې روغتيا وزارت چارواکو شمشاد ته منلې چې د دې وزارت اړوند د ټولو کارکونکو په امتیازونو کې ۱۲ سلنه کموالی راغلی.
د عامي روغتیا وزارت مالي او اداري چارو مرستیال ملا برخت الرحمن شرافت له شمشاد سره په ځانګړې مرکه کې د امتيازاتو د کموالي لامل نه دی په ډاګه کړی، خو ويلي دي چې روان کال عامې روغتيا وزارت لپاره ځانګړې شوې ۷ ميليارده افغانۍ بوديجه د خدماتو رسولو لپاره کافي نه ده.
شرافت په دې اړه وايي: « سږ کال د حکومت پر کچه په ټولو ادارو کې د معاشونو یوه فیصدي کموالی راغلی، خو بیا هم کومه بودیجه چې منظوره شوې، په هغه کې متخصصینو ته ترجېح ورکړل شوې. د معاشونو د کمښت په اړه باید ووایم چې له ۱۰ تر۱۲ سلنو معاشونه کم شوي.»
شرافت د روغتیا نړيوال سازمان هغه وروستی راپور رد کړ چې وايي، د امریکا د مرستو د بندېدو له امله په ۳۰ ولایتونو کې لږ تر لږه ۴۲۰ روغتیايي مرکزونه بند یا لنډ مهاله تړل شوي دي.
د نوموړي په وينا، اوس مهال په هېواد کې هېڅ روغتیایي مرکز تړل شوی نه دی او د ۴۲۰ روغتیایي مرکزونو مالي ملاتړ د نورو نړیوالو سازمانونو له خوا کېږي.
شرافت زیاتوي:« د دوی له لوري حمایت او ملاتړ بند شوی، خو موږ بل ارګان او د یونیسف، آی.سي.آر.سي او روغتیا نړیوال سازمان په ګډون نورو نړیوالو موسسو ته سپارلي. همدارنګه، هغه روغتونونه او مرکزونه چې دغو ادارو ته نه دي سپارل شوي، د افغانستان اسلامي امارت یې خپله ملاتړ کړی.»
د عامې روغتيا وزارت مالي او اداري مرستيال په دې وزارت کې د ډاکټرانو او ورغتيايي کارکونکو د تنقیص اوازې ردوي او زياتوي چې د دې سيسټم د پیاوړتيا لپاره ۵ زره نوي کسان هم پر دندو ګومارل شوي دي.
ملا بخت الرحمن شرافت زياتوي، د نجونو پرمخ د طبي انسټیټیونو تړل کېدو پر روغتیايي سکټور منفي اغېز نه دی کړی او په خبره یې، اوس مهال په دولتي او خصوصي روغتیایي سکټور کې له ۶۰ زره ډېرې ښځينه ډاکټرانې پر دندو بوختي دي.
د عامي روغتیا وزارت مالي او اداري مرستیال وايي: « تر اوسه پورې د نجونو د طبي زده کړو بندېدلو د عامې ورغتیا وزارت پر خدماتو منفي اغېز نه دی کړی. همدا پرون زما په دفتر کې د سهار له اتو بجو تر ۱۲ بجو ما د نجونو هغه ډېپلومې یا سرټفیکېټونه لاسلیکول هغوی طبي زده کړې کړې وې او د عامې ورغتیا وزارت باید سرټفیکېټونه ورکړي وای، نو ویلی شم چې موږ کافي بک اپ لرو. له سیسټم د باندې ښځينه کارکوونکو شمېرو چې دوه یا درې کاله مخکې فارغې شوې دي، شاوخوا ۴۰ زره دی او تر ۶۰ زرو پورې له موږ سره په سیسټم کې موجودې دي او عملا ً په شخصي او دولتي سکټور کې کار کوي.»
بخت الرحمن شرافت پر امریکا او نړیوالې ټولنې غږ کوي چې روغتیایي سکټور دې له سیاست سره نه تړي او له افغانانو سره دې خپلو روغتیایي مرستو ته ادامه ورکړي.
د شرافت په وينا، په نږدې څلورو کلونو کې په ټول هېواد کې ۳۵۰ نوي روغتیایي مرکزونه جوړ شوي او د هېواد ټولو سیمو ته یو شان روغتیایي خدمات رسول شوي دي.
