سیګار د افغانستان روغتیا سیستم په اداره کولو نیوکه کړې

د افغانستان پر بیا رغونې د امریکا څار ادارې (سیګار) په خپل راپور کې د افغانستان د روغتیا سیسټم په اداره کولو نیوکه کړې ده.

په راپور کې راغلي، چې له ۲۰۰۲ کال راهیسې دغې ادارې د افغانستان د روغتیایي سکټور د اړتياوو کمولو لپاره د څه باندې  ۱.۴ میلیارده ډالرو مرسته کړې، خو لا هم په افغانستان کې روغتیایي سیسټم له ګڼو ننګونو سره مخ دی.

د راپور یوه برخه:« له ۲۰۰۲ کال راهیسې د امریکا نړیوالې پراختیایي ادارې په یو لړ مهمو هڅو باندې چې له ډلې یې د افغانستان د روغتیایي سکټور د اړتياوو کمولو لپاره د څه باندې  ۱.۴ میلیارده ډالرو مرستې، چې موخه یې د افغانستان د ثبات پياوړتيا  ده  تمرکز کړی. له دغې پانګونې سره سره د افغانستان د عامې روغتیا سیسټم لا هم له ګڼو ننګونو سره مخ دی،چې په هغه کې د ماشومانو نری رنځ، ګوزڼ، د ماشومانو خوارځواکي او د مېندو لپاره کمزوري روغتیایي خدمتونه په کې شامل دي.»

په ورته وخت کې د افغانستان لپاره د روغتیا نړیوال سازمان استازی لاو ډاپنګ وایي، له افغانانو سره په روغتیایي برخه کې د مرستې لپاره نړیوال مشارکت کلیدي رول لري.

ډاپنګ پر خپله ټویټرپاڼه لیکلي،چې  د دې سازمان څه باندې ۵۰ شریکان یې د افغانستان له خلکو سره روغتیایي مرستو ته هڅولي دي.

هغه زیاته کړې:« افغانانو سره په روغتيايي برخه کې د مرستې لپاره نړيوال مشارکت مهم رول لري، د دې سازمان څه باندې ۵۰ شریکان مو د افغانستان له خلکو سره د روغتیايي مرستو لپاره هڅولي دي. د روغتیا نړیوال سازمان تیار دی، چې په افغانستان کې اړمنو کسانو ته د روغتیايي خدماتو د رسولو مشرۍ رول پر غاړه واخلي.»

روغتیاپالان وايي، ډېری هېوادوال حیاتي مرستو ته اړتیا لري او په افغانستان کې د صحت برخه کې د روغتیا نړیوال سازمان مرستې اړینې ګڼي.

په دې اړه مو د عامې روغتیا وزارت له ویاند سره اړیکه وکړه؛ خو د راپور تر خپرېدو یې نظر شریک نه کړ.

 د افغانستان پر بیا رغونې د امریکا څار ادارې (سیګار) دغه راپور پر د اسې مهال خپرېږي،چې په ځلونو د یادې ادارې ټول راپورونه د اسلامي امارت د چارواکو له خوا بې اساسه بلل شوي؛ خو د روغتیا نړیوال سازمان د شمېرو له مخې، په افغانستان کې ۱۷ ميلیونه او ۶۰۰ زره کسان روغتیايي خدماتو ته اړتیا لري او د دغو خدماتو لپاره څه باندې ۱۸۸ میلیونه ډالرو ته اړتیا ده.